गुण्डा नाइके ‘रिगल’लाई माफी दिइनुको कारण सात दिनभित्र पेश गर्न सरकारलाई सर्वोच्चको आदेश

काठमाडौं । सर्वोच्च अदालतले गुण्डा नाइके रिगल भनिने योगराज ढकाललाई माफी दिनुपर्नाको कारण लिखित रूपमा सात दिनभित्र पेश गर्न सरकारलाई आदेश दिएको छ ।

न्यायाधीश मनोजकुमार शर्माको इजलासले भारती शेर्पाले दायर गरेको रिटमा सुनुवाइ गर्दै सरकारसँग लिखित कारण माग गरेको हो । सर्वोच्चले पीडित परिवारको सुरक्षा व्यवस्था मिलाउन पनि सरकारलाई निर्देशन दिएको छ ।

संविधान दिवसका अवसरमा मन्त्रिपरिषद्को सिफारिसमा राष्ट्रपति रामचन्द्र पौडेलले ढकालको सजाय माफी दिएका थिए । पूर्वपतिका हत्यारालाई माफी दिएपछि भारतीले सर्वोच्चमा रिट दायर गरेकी थिइन् ।

सर्वोच्च अदालतले राष्ट्रपति कार्यालय, प्रधानमन्त्री तथा मन्त्रिपरिषद्को कार्यालय, गृह मन्त्रालय, जिल्ला प्रशासन कार्यालय बाँकेलगायतलाई लिखित जवाफ पेस गर्न भनेको छ ।

२०७२ असार २८ गते ढकालले चेतन मानन्धरलाई नियन्त्रणमा लिएर सुर्खेत रोडस्थित एक होटलमा खुँडा प्रहार गरी हत्या गरेका थिए । हत्यामा दोषी ठहर गर्दै बाँके जिल्ला अदालतले उनलाई सर्वस्वसहित जन्मकैदको सजाय सुनाएको थियो ।

गत असोज २ गते उनी कैद बसेको ८ वर्ष नपुग्दै माफी पाएर छुटेका थिए । भारतीले भने अनसन सुरु गरेकी छन् ।