नन्दबक्स ब्यारेकका मेजर सम्पर्कविहीन, चुँगार्डको एक पसलमा मागेका थिए डोरी

सुर्खेत। डोल्पाको दुनैमा रहेको नन्दबक्स गणका मेजर सम्पर्कविहीन भएका छन् । मेजर विमल पण्डित आइतबार साँझदेखि बेपत्ता भएका हुन्।

मेजर पण्डित एक्लै दुनैबाट पश्चिमतिर पर्ने त्रिपुराकोट हिँडेको र त्यसपछि सम्पर्कविहीन भएको जिल्ला प्रहरी कार्यालय, डोल्पाका प्रहरी नायब उपरीक्षक शिव बुढाथोकीले बताए ।

सम्पर्कविहीन भएदेखिनै नेपाल आर्मी, प्रहरी, सशस्त्र प्रहरी र राष्ट्रिय अनुसन्धानका कर्मचारीले खोजी गरिरहेका छन् ।

मेजर विमल पण्डित आइतबार साँझ एउटा सार्वजनिक जीप रिजर्भ गरेर त्रिपुराकोट पुगेका बताइएको छ ।

त्रिपुराकोटस्थित नरलाल रोकायको पसलमा आफूसँग खर्च गर्ने पैसा नभएको भन्दै ‘फोन पे’ मार्फत केही रकम हाल्दिएर नगद रकम फिर्ता मागेका थिए ।

त्यसपछि उनी त्रिपुरासुन्दरी- १० मा पर्ने लिकुतर्फ गएका र फर्केर चुँगार्ड भन्ने ठाउँमा आएका थिए । स्थानीयकाअनुसार मेजर विमल पण्डितले एक पसलमा डोरी मागेका थिए । त्यहाँ डोरी नभएको बताएपछि उनी त्यहाँबाट हिँडेका थिए ।