राष्ट्रबैंकले गर्‍याे ९ वाणिज्य बैंकलाई कारबाही

काठमाडौं। नेपाल राष्ट्रबैंकले तोकेको वित्तिय मापदण्ड पुरा नगर्ने वाणिज्य बैंकलाई नगद जरिवाना सहित कारबाही गरेको छ।
विभिन्न बैंकबाट राष्ट्रबैंकले १५ करोड ४७ लाख ८४ हजार १४० रुपैयाँ २६ पैसा नगद जरिवाना गरेको छ।

जरिवानामा पर्नेहरूमा सरकारी बैंक पनि छन्। जस अनुसार कृषि विकास बैकले ६९ लाख ५८ हजार ८सय ३१ रुपैयाँ ८९ पैसा जरिवाना तिर्नुपर्नेछ।

यसैगरी,राष्ट्रिय वाणिज्य बैंक १० लाख रुपैयाँ र हिमालयन बैंक ७१ लाख ७२ हजार ९ सय ५९ रुपैयाँ ३६ पैसा जरिवानामा परेको छ।

राष्ट्रबैंक स्रोतका अनुसार कृषि विकास बैंक र हिमालयन बैंक कर्जा÷निक्षेप अनुपात (सीडी रेसियो) कायम नगरेको आधारमा कारबाहीमा परेका हुन् भने राष्ट्रिय वाणिज्य बैंक सम्पत्ति शुद्धिकरण सम्बन्धी कसुरमा राष्ट्र बैंकको कारबाही सूचिमा परेको हो।

त्यसैगरी हाल प्रभू बैंकसँग मर्जरमा गएको तत्कालीन सेन्चुरी बैंकलाई २०७९ साउन र भदौ महिनामा कर्जा-निक्षेप (सीडी रेसियो) कायम नगरेको भन्दै केन्द्रीय बैंकले २ करोड ८४ लाख ७ सय ३२ रुपैयाँ ८६ पैसा जरिवाना गरेको छ।

उता तोकिएको कर्जा–निक्षेप अनुपात कायम नगर्ने नेपाल बैंक १८ लाख ५९ हजार ७ सय ५२ रुपैयाँ ३८ पैसा जरिवानामा परेको छ भने, नबिल बैंक ६ करोड ४६ लाख ४५ हजार ३२ रुपैयाँ ७४ पैसा जरिवानामा परेको छ।

२०७९ भदौ र असोज दुई महिनाको कर्जा–निक्षेप अनुपात कायम नगर्ने ग्लोबल आईएमई बैंकलाई समेत केन्द्रीय बैंकले ४ करोड ४२ लाख ४६ हजार ८३१ रुपैयाँ ३ पैसा जरिवाना गरेको छ।

यसैगरी आफ्नो अख्तियारी भन्दा बाहिर गएर कर्जा स्वीकृत गर्ने प्रमुख कार्यकारी अधिकृत रहेको तत्कालिन नेपाल क्रेडिट एण्ड कमर्स बैंकलाई केन्द्रीय बैंकले नेपाल राष्ट्र बैंक ऐन, २०५८ को दफा १०० को उपदफा (२) को खण्ड (ग) बमोजिम ५ लाख रुपैयाँ जरिवाना गरिएको जनाएको छ।

यता सहुलियतपूर्ण कर्जा प्रवाहमा औचित्य पुष्टि नहुने क्षेत्रमा कर्जा दिने, कतिपय मुद्दती निक्षेपमा प्रकाशित ब्याजदरभन्दा बढी ब्याजदर प्रदान गर्ने तथा कर्जाको जोखिमभार मेन्टेन नगर्ने कुमारी बैंकलाई भने प्रथम पटक सचेत गराइएको केन्द्रीय बैंकले जनाएको छ।