हिन्दू विश्वविद्यालय स्थापनाका लागि अध्ययन समितिले पर्यटनमन्त्रीलाई बुझायो प्रतिवेदन

काठमाडौं। श्रीपशुपति हिन्दू विश्वविद्यालय स्थापनाका लागि सम्भाव्यता अध्ययन समितिले पर्यटनमन्त्री सुदन किराँतीलाई अध्ययन प्रतिवेदन बुझाएको छ ।

आइतबार संस्कृत,पर्यटन तथा नागरिक उड्डयन मन्त्रालयमा एक कार्यक्रमको आयोजना गरी समितिले मन्त्री किराँतीलाई श्रीपशुपति हिन्दू विश्वविद्यालय सम्भाव्यता अध्ययन प्रतिवेदन बुझाएको हो ।

एक महिनाभित्र प्रतिवेदन बुझाउने गरी डा.जगमान गुरुङ संयोजक रहेको अध्ययन समितिले समयसीमा भीत्रै
अध्ययन प्रतिवेदन बुझाएको हो ।

श्रीपशुपति हिन्दू विश्वविद्यालय स्थापनाका लागि सम्भाव्यता अध्ययन समितिको प्रतिवेदन बुझ्दै पर्यटनमन्त्री किराँतीले
नेपालमा यस्ता धेरै अध्ययन समिति बन्ने, तर पाएको जिम्मेवारी पूरा नहुने गरेको अवस्थामा यो समितिले त्यो प्रवृत्तिको ब्रेक गरेको बताए ।

उनले समितिले श्रीपशुपति हिन्दू विश्वविद्यालय स्थापनाका लागि सम्भाव्यता अध्ययन गरेर बनाएको प्रतिवेदन विस्तृत अध्ययन गर्ने बताए । उनले संविधानले समाजवाद उन्मुख राज्यको व्यवस्था गरेको भन्दै समाजवाद गाडी वा जहाज चढेर
नआउने बताए।

समाजवाद सरकारले काम गरेर ल्याउनुपर्ने बताउँदै उनले नेपाली मूल्य र मान्यताहरूलाई विस्थापित गरेर समाजवादको
कल्पना गर्न नसकिने भन्दै यसतर्फ समाजको ध्यान जान नसकेको बताए। उनले समितिले बुझाएको प्रारम्भिक अवधारणा भएको भन्दै विस्तृत अध्ययनसमेत यही समितिले गर्नुपर्ने बताए । मन्त्री किराँतीले २०८१ वैशाख १ गते शिलान्यास गर्नेगरी काम गर्न बताए।

समितिले नेपालको धर्म, दर्शन, संस्कृति र लोकपरम्परा लगायतको नेपालमुखी रैथाने विषय अध्ययन अध्यापन गराउन श्रीपशुपति हिन्दू विश्वविद्यालय आवश्यक रहेका प्रतिवेदनमा उल्लेख छ । प्रतिवेदनमा उक्त विश्वविद्यालमा स्नातकोत्तर, एम.फिल. र विद्यावारिधि तहका शैक्षिक कार्यक्रम सञ्चालन गर्न सकिने उल्लेख छ।