नेपाल उद्योग वाणिज्य महासंघको वरिष्ठ उपाध्यक्षमा अञ्जन श्रेष्ठ

काठमाडौ। नेपाल उद्योग वाणिज्य महासंघको वरिष्ठ उपाध्यक्षमा अञ्जन श्रेष्ठ निर्वाचित भएका छन्। प्रतिस्पर्धी उमेशलालले श्रेष्ठले दाबी छाडिदिएपछि अञ्जन वरिष्ठ उपाध्यक्ष बनेका हुन् ।

बुधबार भएको पहिलो चरणको मतदानमा तीनजना उम्मेदवार मध्ये कसैले पनि ५० प्रतिशतभन्दा बढी मत नल्याएपछि आज दुई जनाबीच मतदान हुने कार्यतालिका थियो।

दिउँसो २ बजे हुनुपर्ने पुनः मतदान अगाडी सर्वसम्मत नेतृत्व चयनको प्रयास हुँदा उमेशले अञ्जनलाई समर्थन गरेपछि सहमति भएको हो ।

तीन प्रतिस्पर्धीमध्ये रामचन्द्र सांघाई आउट भएपछि दोस्रो चरणमा उमेश र अञ्जनबीच प्रतिस्पर्धा हुँदै थियो । तर, लामो छलफलपछि उमेश पछि हटेसँगै अञ्जनले बाजी मारेका हुन्।

निर्वाचन स्थल कमलादीबाट सर्वसम्मतिको वरिष्ठ उपाध्यक्ष श्रेष्ठसहित निर्वाचित टिमको घोषणा हुँदैछ । अञ्जन श्रेष्ठ, उमेशलाल श्रेष्ठ र रामचन्द्र संघाईको वरिष्ठ उपाध्यक्षमा प्रतिस्पर्धा हुँदा सबैभन्दा थोरै मत संघाईले ल्याएका थिए ।

पहिलो चरणको मतदानमा अञ्जनले ३७.९९, उमेशले ३१.९९ र रामचन्द्र ३०.४६ प्रतिशत मत पाएका थिए ।