नेसपाको समर्थन पौडेललाई

काठमाडौं। पूर्वप्रधानमन्त्री डा.बाबुराम भट्टराई नेतृत्वको नेपाल समाजवादी पार्टी (नेसपा)ले राष्ट्रपति निर्वाचनमा आठ दलीय गठबन्धनका साझा उम्मेदवार नेपाली कांग्रेसका नेता रामचन्द्र पौडेललाई मत दिने भएको छ ।

सो पार्टीको बैठकले आगामी फागुन २५ गते हुने चुनावमा नेपाली कांग्रेसका उम्मेदवार रामचन्द्र पौडेललाई मत दिने निर्णय गरेको हो । बैठकले राष्ट्रपति चुनावका सन्दर्भमा बनेको नयाँ गठबन्धनलाई सहयोग गर्ने निर्णय पनि गरेको नेसपाले जनाएको छ ।

गत मंसिर ४ को निर्वाचनमा नेकपा माओवादी केन्द्रको चुनाव चिह्न गोलाकारभित्रको हँसिया हथौडा लिएर निर्वाचन लडेको नेसपाका संघीय संसदमा महेन्द्र राय रादवसहित २ र प्रदेश सभामा २ जना सांसद छन्।

सो पार्टीको बागमती प्रदेश सभामा आन्तरिक मामिला तथा कानुनमन्त्रीसमेत रहेका गंगानारायण श्रेष्ठ र गण्डकी प्रदेश सभामा फणिन्द्र देवकोटा सांसद छन्। राष्ट्रपति चुनावमा नेसपाको मतभार २५४ छ ।