सांसदका छोराले सेल्फी खिच्न नपाएपछि भारतीय गायक सोनु निगममाथि आक्रमण

काठमाडौं। सेल्फी खिच्न नपाएको झोंकमा एउटा समूहले भारतीय गायक सोनु निगममाथि मुम्बईको सांगीतिक कार्यक्रममा आक्रमण गरेको छ ।

मुम्बईको चेम्बुरमा आयोजित कन्सर्टमा सोनु र उनको टोलीमाथि आक्रमण भएको भारतीय सञ्चारमाध्यमले जनाएका छन् ।

सोनुमाथि आक्रमण भएको भिडियो समेत सामाजिक सञ्जालमा देख्न सकिन्छ । जसमा सोनुको टोलीका एक व्यक्तिलाई स्टेजबाट तल धकेलिएको र सोनुले प्रस्तुति दिइरहेको बेला शिव सेना पार्टीका एक विधायकले आक्रमण गरेको आरोप पनि छ । ती विधायकका छोराको सोनुसँग सेल्फी खिच्ने इच्छा पूरा हुन नपाएपछि स्टेजमा आक्रमण गरेको खबरमा उल्लेख छ ।

सुरक्षा गार्डले आक्रमणको स्थितिलाई नियन्त्रणमा ल्याउन प्रयास गर्दा अन्य केही घाइते भएका छन् । घटनाबारे उजुरी दिन सोनु प्रहरी कार्यालयमा पुगेका थिए । उजुरी दिएर गायक सोनु मुम्बई विमानस्थलबाट दिल्ली गएको बताइएको छ ।

तर, भारतीय सञ्चारमाध्यम बलिउड हंगामाले भने आक्रमणपछि चोटपटक लागेकाले सोनुलाई पनि अस्पताल पुर्‍याइएको जनाएको थियो । सो घट्नाबारे अर्को एक भिडियोमा सोनु निगमलाई कारबाट ओर्लिएर विमानस्थल प्रवेशद्वारतर्फ जाँदै गरेको देख्न सकिन्छ ।

भिडियोमा गायक सोनुलाई आर्मी प्रिन्ट ज्याकेट र पाइन्टमा देख्न सकिन्छ । घटनाका विषयमा प्रहरीले थप अनुसन्धान अगाडि बढाएको छ ।