वैदेशिक रोजगार सुधारको अभियानबाट पछि हट्दिनँ : श्रममन्त्री श्रेष्ठ

काठमाडौं। श्रम, रोजगार तथा सामाजिक सुरक्षामन्त्री कृष्णकुमार श्रेष्ठले वैदेशिक रोजगारीको क्षेत्र सुधार गर्ने अभियानबाट आफू पछि नहट्ने प्रतिवद्धता जनाएका छन्।

श्रम, रोजगार तथा सामाजिक सुरक्षा मन्त्रालयले नेपाल र संयुक्त अरब इमिरेट्स (यूएई)बीच हुने संयुक्त कार्य समिति बैठकको तयारी सम्बन्धमा सरोकारवालाहरुसँग गरेको छलफलमा मन्त्री श्रेष्ठले वैदेशिक रोजगारीमा रहेका लाखौँ युवाको जीवन सुरक्षित बनाउनु सरकारको प्रमुख दायित्व रहेको बताए।

आफूले श्रमिकको हितमा परिणाममूखी काम गर्दै आइरहेको चर्चा गर्दै मन्त्री श्रेष्ठले वैदेशिक रोजगारलाई सुरक्षित, व्यवस्थित र मर्यादित बनाउन सरोकारवालाहरुबाट सहयोगको अपेक्षा गरिएको बताए।

वैदेशिक रोजगारीमा जाने श्रमिकमाथि शोषण गर्नेहरुलाई सरकारले हदैसम्मको कारबाही गर्ने मन्त्री श्रेष्ठले बताए। वैदेशिक रोजगारीमा जाने श्रमिकलाई सरल, पारदर्शी र विश्वसनीय सेवा पु¥याउनुपर्ने उनको भनाइ छ।

नेपाल र संयुक्त अरब इमिरेट्स (यूएई)बीच हुने संयुक्त कार्य समिति बैठकमा नेपालले न्यूनतम पारिश्रमिक वृद्धि, सीप विकासमा लगानी, पुनर्एकीकरण तथा पुनःस्थापना कार्यक्रम सञ्चालनजस्ता विषयलाई प्राथमिकता दिने मन्त्री श्रेष्ठको भनाइ छ।

कार्यक्रममा मन्त्रालयका सचिव एकनारायण अर्यालले वैदेशिक रोजगारी क्षेत्रका कमी–कमजोरी सुधार्न मन्त्रालयको नेतृत्व गम्भीर भएर लागेको बताएको थियो। नेपालले सातओटै प्रदेशमा संचालन गर्ने सीप विकास तालिम केन्द्रमा लगानी, श्रमिकको स्वास्थ्य बीमा, सामाजिक सुरक्षा योजनामा सहभागिता, न्यूनतम पारिश्रमिक वृद्धि लगायत एजेण्डा नेपालले प्रस्तुत गर्ने अर्यालले बताए।

कार्यक्रमका सहभागीहरुले यूएईमा रहेका नेपाली श्रमिकको न्यूनतम पारिश्रमिक वृद्धि, सुरक्षित कार्य वातावरण तथा न्याय र सूचनामा सहज पहुँच सुनिश्चित गर्ने विषयलाई नेपालले प्राथमिकता दिनुपर्ने बताए।

नेपाल र यूएईबीच भएको श्रम समझदारी कार्यान्वयनमा सहजीकरण गर्न दुवै देशका प्रतिनिधि सम्मिलित संयुक्त कार्यसमितिको बैठक यूएईमा हुँदैछ।

वैदेशिक रोजगारीको प्रलोभनमा परेर पर्यटन तथा अन्य भिसामा यूएई गई अलपत्र परेका नेपालीहरूको व्यवस्थापनका विषयमा यूएई सरकारसँग छलफल गर्न मन्त्री श्रेष्ठ नेतृत्वको टोली यूएई जाँदैछ। सोही क्रममा नेपाल–यूएई संयुक्त कार्यसमितिको बैठक पनि आयोजना हुनेछ।