भूकम्पले भत्काएका ५० हजार घरको पुनर्निर्माण सम्पन्न

काठमाडौं।  २०७२ सालमा गएको विनाशकारी भूकम्पले भत्काएका घरहरूको पुनर्निर्माण सकिएको छ।

भारत सरकार र संयुक्त राष्ट्रसंघ विकाश कार्यक्रम यूएनडीपीको संयुक्त सहयोगमा गोरखा र नुवाकोटका करीब ५० हजार घर पुनर्निर्माण सम्पन्न भएको छ। आवास पुनर्निर्माण सम्पन्न भएपछि भूकम्पको केन्द्रबिन्दु रहेको गोरखाको बारपाकका स्थानीयहरू ६ वर्षपछि आफ्नै आवासमा बस्न थालेका छन्।

गोरखा नगरपालिका वडा नम्बर १३ का वडाध्यक्ष हरिबहादुर खनालले अहिले निर्माणसम्बन्धी अधिकांश कामहरू सकिएको र केही विद्यालय तथा सांस्कृतिक सम्पदाका कामहरू बाँकी रहेको बताए। उनले नेपाल सरकारले भूकम्पका कारण भत्किएका घरहरू पुनर्निर्माणका लागि ३ लाख रुपैयाँ दिए पनि त्यो पर्याप्त नहुँदा कतिपय आवास अहिलेसम्म पनि निर्माण हुन नसकेको गुनासो गरे।

‘‘निर्माणसम्बन्धीका धेरै कामहरू भएका छन् तर नेपाल सरकारले ३ लाख रुपैयाँ भन्दा धेरै सहयोग गर्न सकेन जसले पुनर्निर्माण समयमै हुन सकेन” उनले भने।

२०७२ वैसाख १२ गतेको विनाशकारी भूकम्प र २९ गतेको पराकम्पका कारण नेपालमा ठूलो जनधनको क्षति भएको थियो।