पोखराबाट पेस्तोलसहित पक्राउ परेका यी युवा, चौकी लगेपछि थाहा भयो १३ वटा मुद्दा पहिल्यै चलेको

काठमाडौं । मुद्दामाथि मुद्दा लागेका एक युवा पोखराबाट अटोमेटिक पेस्तालसहित पक्राउ परेका छन् । पक्राउ पर्नेमा पोखरा महानगरपालिका–१८ सराङकोटका ३८ वर्षीय नरबहादुर विक छन् ।

उनलाई बिहीबार लेकसाइडबाट वडा प्रहरी कार्यालय बैदामको टोलीले पक्राउ गरेको हो ।

लेकसाइडस्थित दीपक गिरीको बन्दै गरेको घरमा विकले ९ एमएमको अटोमेटिक पेस्तोल र त्यसमा लाग्ने १ राउण्ड गोली लुकाएर राखेको अवस्थामा प्रहरीले बरामद गरेको छ ।

बागमती प्रदेश ०३३ प् १६३३ नम्बरको मोटरसाइकलसहित पक्राउ परेका विक डाँका चोरी र लागु औषध मुद्दाका अभियुक्त समेत हुन् ।

राजु नेकेट भनेर समेत चिनिने उनीविरुद्ध यसअघि १३ वटा मुद्दा चलेको समेत पाइएको छ । पक्राउ परेपछि प्रहरीले सीआरएस (क्रिमिनल रेकर्ड सिस्टम) जाँदा १३ वटा मुद्दाको विवरण खुलेको हो ।

उनीविरुद्ध ९ चैत २०६२ मासार्वजनिक अपराधको मुद्दा चलेको थियो । २६ चैत २०६५ मा पनि कास्की प्रहरीबाटै सार्वजनिक अपराधको मुद्दा चलेको थियो ।

त्यस्तै १९ साउन २०६६ मा लागु औषध, २६ चैत २०६६ मा सार्वजनिक अपराध, २ असार २०६७ मा चोरी, ६ असार २०६७ मा चोरीको मुद्दा चलेको सीआरएमा भेटिएको छ ।

६ भदौ २०६७ मा सार्वजनिक अपराध, ११ माघ २०७१ मा लागु औषध, ८ माघ २०७१ मा चोरी, १६ कात्तिक २०७७ मा अभद्र व्यवहार, २८ फागुन २०७७ मा अभद्र व्यवहार, ११ मंसिर २०७९ मा लागु औषध र २२ कात्तिक २०८० मा चोरी तथा डाँका कसुरको मुद्दा चलेको पाइएको छ ।