काठमाडौं। काठमाडौंका विभिन्नका पाँच वटा सहकारीहरू एक आपसमा मर्ज भएर बनेको ‘आइडल यमुना’ सहकारीले बचतकर्ताको चार हजार रुपैयाँ पनि फिर्ता दिन नसकेपछि बचतकर्ताले कार्यालय घेराउ गरेका छन् । पटक-पटकको प्रतिबद्धता अनुसार बचत रकम फिर्ता नगरेको भन्दै बचतकर्ताहरूले बौद्ध टुसालस्थित सहकारीको एक शाखा कार्यालय घेराउ गरेका हुन् ।
घेराउ गर्न आउनेमा चार हजार रुपैयाँ राख्नेदेखि लाखौँ रुपैयाँ बचत गर्नेसम्मका छन् । बतचकर्ताले अहिले ‘आइडल यमुना’ सहकारीको कम्युटरसहित जिन्सी सामान उठाउने चेतावनी दिइरहेका छन् । सहकारीका कर्मचारीबीच वादविवाद भइरहेको छ । फोटो भिडिओ खिच्न गएका पत्रकारलाई समेत फोटो भिडिओ डिलिट गर्न भन्दै धम्क्याएका छन् ।
सञ्चालकहरूले बचत रकम फिर्ता गर्ने समय पटकपटक टारेपछि आफूहरू बाध्य भएर कार्यालय घर घेर्न आउनुपरेको सहकारीका बचतकर्ताहरूले बताएका छन् । अहिले सहकारीका सञ्चालकहरू फरार छन् । सहकारीका सञ्चालकहरूले हजारौँ बचतकर्ताको १० अर्ब जति रकम लिएर सम्पर्कविहीन भएको आरोप लागेको छ ।
सहकारीका सञ्चालकनहरु ज्ञानबहादुर तामाङ, कुयाङ लामालगायत अहिले आफूहरूको समेत सम्पर्कमा नरहेको कर्मचारीहरूले बताएका छन् ।
२ वर्षअघि नेशनल नमोवुद्ध बचत तथा ऋण सहकारी संस्था, नागरिक कल्याण बहूद्देश्यीय सहकारी संस्था, सत्कार बचत तथा ऋण सहकारी संस्था र घेदुङ बहुउद्देश्यीय सहकारी संस्था लिमिटेड गाभिएर आइडल यमुना बहूद्देश्यीय सहकारी संस्था बनेको थियो । मर्जपछि संस्थाको कारोबार झन्डै ९ अर्ब रुपैयाँ पुगेको थियो ।
Facebook Comment
Comment