काठमाडौं । चौधरी ग्रुपका प्रबन्ध निर्देशक निर्वाण चौधरीले एनसेल प्रकरणबारे कडा टिप्पणी गरेका छन् । चौधरीले एनसेलका नाममा अहिले जे भइरहेको सीजी टेलिकम त्यसैका लागि रोकिएको गम्भीर आरोप लगाएका छन् ।
बिहीबार सामाजिक संजालमा उनले यो प्रकरणबाट जनताले टेलिकम क्षेत्रका माफिया र संगठनलाई चिन्न पाएको समेत बताएका छन् ।
निःशुल्क भ्वाइस र एसएमएस तथा ५० प्रतिशत सस्तोमा डेटा उपलब्ध गराउने वाचा गरेको कम्पनी (सीजी) लाई स्वीकृति नदिएको भन्दै उनले अव यसको पटाक्षेप हुने समेत उल्लेख गरेका छन् ।
एनसेल प्रकरणमा संलग्न पात्रहरुले नै सीजीलाई स्थापित गर्न नदिएको उनको दाबी छ । उनले भनेका छन्, ‘आज जे भएको छ यही गर्नका लागि सीजी टेलिकमलाई यिनीहरु सबै मिलेर रोकेका हुन् ।’
चौधरी लेख्छन्, “सीजी टेलिकमले उपभोक्तालाई भ्वाइस र एसएमएस निःशुल्क उपलब्ध गराउने र ५० प्रतिशत सस्तोमा डेटा उपलब्ध गराउने वाचा गर्दा पनि किन नेपाली कम्पनीलाई स्वीकृति दिइएन भन्ने कुराको अब पटाक्षेप हुँदैछ, हेर्दै जाऔँ, अरु के के देख्न पाइने हो । एनसेल काण्डमा तिनै पात्रहरू संलग्न छन्, जसले १० वर्षदेखि नेपाली टेलिकमलाई नेपालमा स्थापित हुन दिएनन् ।”
उनले देशमा अहिले ‘तँ कुटेजस्तो गर म रोएजस्तो गर्छु’ नामक सिनेमा चलिरहेको भन्दै व्यङ्ग्य गरेका छन् ।
Facebook Comment
Comment