चन्द्रागिरिमा भारतको सहयोगमा निर्मित विद्यालय भवनको उद्घाटन

काठमाडौं।  शैक्षिक क्षेत्र पुनर्निर्माणमा भारत सरकारको अनुदान सहयोगमा निर्माण गरिएको काठमाडौंको चन्द्रागिरिस्थित श्री विष्णुदेवी माध्यमिक विद्यालय भवनको उद्घाटन भएको छ ।

नेपाल सरकारको भूकम्प उत्थानशील पुनर्निर्माण मापदण्ड अनुरूप करिब ७ करोड लागतमा विद्यालय भवनको निर्माण गरिएको हो । यस नवनिर्मित संरचनामा दुईवटा ब्लक रहेका छन् जसमा १३ वटा कक्षाकोठा, प्रशासनिक कक्ष, पुस्तकालय, बहुउद्देश्यीय हल, प्रयोगशाला आदि रहेका छन् ।

यो बालमैत्री, लैङ्गिकमैत्री र अपाङ्गमैत्री भूकम्प प्रतिरोधी संरचनाले ५०० जना भन्दा बढी विद्यार्थीलाई लाभान्वित तुल्याउनुका साथै प्रभावकारी सिकाइको वातावरण प्रदान गर्नेछ ।

भूकम्पपछिको पुनर्निर्माणका लागि भारत सरकारले उपलब्ध गराएको अनुदान रकम ५० मिलियन अमेरिकी डलरअन्तर्गत नेपालका आठ जिल्लामा निर्माण भइरहेका ७१ शैक्षिक संस्थामध्येको एक हो ।

७१ मध्ये ६५ वटा विद्यालयको निर्माण सम्पन्न भइसकेको छ । बाँकी ६ वटा पनि छिट्टै सम्पन्न हुने बताइएको छ ।