एजेन्सी। अमेरिकाको हवाई राज्यको माउई सहरमा भएको भीषण आगलागीमा शव खोज्ने क्रम चलिरहेको छ ।
उद्धार टोलीहरूले प्रति दिन १० देखि २० वटा थप शवहरु फेला पारिरहेका त्यहाँका गभर्नरलाई उधृत गर्दै बीबीसीले जनाएको छ ।
मृत्यु हुनेको संख्या बढेर ९६ पुगेको छ, जसले यसलाई एक शताब्दीभन्दा बढीमा अमेरिकाको सबैभन्दा घातक डढेलो बनाएको छ। ९६ जनाको शवलाई डीएनए प्रविधिबाट अनुसन्धान गर्दा जम्मा ३ जनाको मात्रै पहिचान भएको हो ।
गभर्नर जोस ग्रीनले मृत्युको पूर्ण संख्या जान्न १० दिन लाग्न सक्ने बताएका छन् । बेपत्ताको संख्या अहिले करिब १ हजार ३ सय पुगेको उनले बताए ।
आगलागीबाट लाहाइना सहर झण्डै पूरै जलेर नष्ट भएको छ । “पूर्ण विनाश बाहेक हेर्नको लागि केहि छैन,” ग्रीनले भने ।
१३ सय जना वेपत्तामध्ये केही भागेको हुनसक्ने र धेरै आगोमै जलेको हुनसक्ने आशंका छ । अब भेटिएका शव पहिचान गर्न पनि ठूलो चुनौती रहेको प्रहरीले जनाएको छ ।
आगलागीले ध्वस्त भएको सहरमध्ये अहिलेसम्म १० प्रतिशत क्षेत्रको मात्रै खोजी भएको र बाँकी क्षेत्रको खोजीका क्रममा झन धेरै हृदयविदारक क्षण आउने गभर्नरले जनाएका छन् ।
हवाई राज्यको यो आगलागीलाई अमेरिकाको विपद् इतिहासकै ठूलो घटनाका रुपमा लिइएको छ । आगलागीले एक ऐतिहासिक सहर खरानीमा परिणत भएको छ ।
Facebook Comment
Comment