काठमाडौं। नेकपा (एमाले)का अध्यक्ष केपी शर्मा ओलीले कोशीबाहेकको बजेट यथास्थितिमा पास नगर्न सातै प्रदेशका नेकपा (एमाले) बाट निर्वाचित प्रदेश सभासद्हरूलाई निर्देशन दिएका छन् ।
आर्थिक वर्ष २०८०/८१ का लागि प्रदेश सरकारहरूद्वारा प्रदेशसभामा पेश गरेको नीति, कार्यक्रम र बजेटबारे छलफल गर्न आयोजित भर्चुअल बैठकमा सबै प्रदेशसभाका (एमाले) संसदीय दलका नेताहरूको प्रस्तुति सुनेपछि उनले यो बजेट यथास्थितिमा पास नगर्न निर्देशन दिएका हुन् ।
बैठकलाई निर्देशनात्मक सम्बोधन गर्दै अध्यक्ष ओलीले देशको बजेट सरकार सञ्चालन, भौतिक पूर्वाधार विकास र सामाजिक सेवालाई केन्द्रमा राखेर बन्नुपर्ने भए पनि सरकारमा रहेका मानिसहरूको स्वार्थ प्रेरित बनाइएकोमा आपत्ति प्रकट गरे । उनले भने, ‘बजेट विनियोजन पैत्रिक सम्पत्ति जस्तो गरी मुख्यमन्त्री, अर्थमन्त्रीहरूको निर्वाचन क्षेत्रमा केन्द्रित गरेर बजेटको दुरुपयोग गर्नु आपत्तिजनक छ’, अध्यक्ष ओलीले बजेटका गलत कुराहरू सच्याउन बाध्य पार्ने गरी सशक्त विरोध गर्न निर्देशन दिँदै भने, ‘बजेट छलफलमा भाग लिँदा विरोधका लागि विरोध नभई देशलाई नकारात्मक असर पार्ने कुराहरूलाई परिवर्तन गर्नेगरी उठाउनुस् ।’
त्यसक्रममा अध्यक्ष ओलीले कोशी प्रदेशबाहेक बजेट यथास्थितिमा पास गर्न लायक नरहेको पनि बताए । अध्यक्ष ओलीले कोशी प्रदेश नामकरण र त्यसपछि उत्पन्न परिस्थितिका सन्दर्भमा पार्टीका धारणा राख्दै प्रदेश सभाको दुईतिहाईले विधिवत् ढङ्गले निर्णय गरेको कोशी नामकरणलाई लिएर झमेला निकाल्न खोजिएको बताए।
बैठकमा सुदूरपश्चिम प्रदेशका संसदीय दलका नेता राजेन्द्रसिंह रावल, कर्णाली प्रदेशका संसदीय दलका नेता यामलाल कँडेल, लुम्बिनी प्रदेश संसदीय दलका नेता लीला गिरी, गण्डकी प्रदेश संसदीय दलका प्रमुख सचेतक गोविन्द नेपाली, बागमती प्रदेश संसदीय दलका नेता जगन्नाथ थपलिया, मधेस प्रदेश संसदीय दलका नेता सरोज यादवले प्रदेश सरकारको नीति, कार्यक्रम र बजेटका बारेमा जानकारी गराउँदै धारणा राखेको एमाले प्रचार विभाग सचिव गगन विष्टले जारी गरेको विज्ञप्तिमा उल्लेख छ ।
Facebook Comment
Comment