मुम्बईसँग गुजरात पराजित, राशिद खानको ७९ रन खेर गयो

नेपालभ्युज

एजेन्सी। इन्डियन प्रिमियर लिग (आईपीएल) क्रिकेटमा शीर्ष स्थानको गुजरात टाइटन्स मुम्बई इन्डियन्ससँग पराजित भएको छ ।

वाङखडेमा भएको खेलमा मुम्बईले दिएको २ सय १९ रनको लक्ष्य पछ्याएको गुजरातले निर्धारित २० ओभरमा ८ विकेट गुमाउँदै १ सय ९१ रन बनायो । उसका राशिद खानले ३२ बलमा १० छक्कासहित नटआउट ७९ रन बनाए।

टस हारेर पहिला ब्याटिङ गरेको मुम्बईले निर्धारित २० ओभरमा ५ विकेट गुमाएर २ सय १८ रन बनाएको थियो । उसका सूर्य कुमार यादवले शतकीय पारी खेले । उनले ४९ बलमा १ सय ३ रन बनाए । यादवको आईपीएल क्रिकेटमा पहिलो शतक पनि हो ।

गुजरातका राशिद खानले ४ तथा मोहित शर्माले एक विकेट लिए । मुम्बई १२ खेलमा १४ अंकका साथ तालिकाको तेस्रो स्थानमा पुगेको छ । १६ अंकसहित गुजरात शीर्ष स्थानमा कायमै छ ।