नेपालगञ्जमा बम बनाउने क्रममा पड्किँदा विप्लव समूहका दुईजना गम्भीर घाइते

नेपालगञ्ज।  नेपालगञ्जको भृकुटी नगरमा प्रेसरकुकर बम बनाउँदै गर्दा विस्फोट भएको छ । बम बनाउँदै गरेको अवस्थामा विस्फोट हुँदा विप्लव नेकपाका दुई कार्यकर्ता गम्भीर घाइते भएका छन् ।

बाँकेका प्रहरी उपरीक्षक श्यामकृष्ण अधिकारीका अनुसार विस्फोटका बेला विप्लवका कार्यकर्ता बम बनाउँदै थिए । गम्भीर घाइते उनीहरूको भेरी अस्पतालमा उपचार भइरहेको उनले जानकारी दिए ।

बम विस्फोटबाट घाइते भएका दुवैलाई स्थानीय युवाले उपचारका लागि भेरी अस्पतालमा पुर्‍याएका थिए । घाइते भएका कार्यकर्ता धर्म बडुवाल र डिल्ली क्षेत्री रहेको प्रहरीले जनाएको छ ।

विप्लवमा समूहका कार्यकर्ता भृकुटीनगरस्थित श्रीकला मल्लको घरमा डेरा गरेर बस्ने गरेका थिए । उनीहरुको डेरामा खानतलासी गर्दा एउटा प्रेसर कुकर बम फेला परेको प्रहरीले जानकारी दिएको छ ।

फेला परेको बमलाई डिस्पोज गर्न नेपाली सेनाको टोली घटना स्थलमा पुगेको छ । विप्लव नेकपाका तीन जना कार्यकर्ता भने भागेका छन् ।