व्यापारी उमेश श्रेष्ठ र नेता कृष्णभक्तसँग रवि लामिछानेको भिडन्त, कसले मार्ला बाजी ?

काठमाडौं। यसअघिको प्रतिनिधिसभा तथा प्रदेशसभा र दुई वटै स्थानीय निर्वाचनमा चितवन चर्चाको केन्द्रमा थियो । माओवादी केन्द्रका अध्यक्ष पुष्पकमल दाहाल प्रचण्ड उम्मेदवार भएकाले संघको चुनाव र पुत्री रेणु दाहाल भरतपुर महानगरको मेयरका लागि मैदानमा उत्रिएकाले चितवन सधैँ चर्चामा रहेको थियो ।

यसपटक प्रचण्ड गोरखा पुगेका छन्, तर पनि चितवनको राजनीतिमा चाख नघट्ने देखिएको छ ।  चितवनका क्षेत्रमा नाम चलेका नेता र व्यक्तित्व चुनावी मैदानमा प्रवेश गरेका छन् । क्षेत्र नम्बर-२ मा त झन् रोचक भिडन्त हुने भएको छ ।

उक्त क्षेत्रमा राष्ट्रिय स्वतन्त्र पार्टीका अध्यक्ष तथा टेलिभिजन कार्यक्रमका पूर्वप्रस्तोता रवि लामिछाने, कांग्रेसको तर्फबाट व्यापारीक पृष्ठभूमिका नेता तथा राज्यमन्त्री उमेश श्रेष्ठ र नेकपा एमालेका तर्फबाट कृष्णभक्त पोखरेल चुनावी मैदानमा छन् ।

चितवन-२ मा एमाले नेता पोखरेल दोस्रोपटक उम्मेदवार बनेका हुन् । २०७० सालको संविधानसभाको दोस्रो चुनावमा क्षेत्र नम्बर ३ बाट निर्वाचित पोखरेल २०७४ सालको चुनावमा २ बाट निर्वाचित भएका थिए । २०७४ सालको चुनावमा एमाले र माओवादी मिलेर चुनाव लडेका थिए ।

पोखरेलले  ४४ हजार ६ सय ७० मत ल्याउँदा नेपाली कांग्रेसका शेषनाथ अधिकारीले २७ हजार ३ सय १४ मत ल्याएका थिए । २०७४ सालमा १७ हजार मत अन्तरले विजयी भएका पोखरेललाई यतिबेला भने चुनाव जित्न सजिलो छैन । नेकपा एमाले फुटेको छ, कांग्रेस र माओवादी सहितका दलले गठबन्धन गरेका छन् । राप्रपाले पनि आफ्नै उम्मेदवारी दिएको छ । स्वतन्त्र पार्टीका उम्मेदवार रवि लामिछाने पनि पोखरेलका लागि अर्को ठूलो बाधक बन्न सक्ने देखिन्छ ।

नेपाली कांग्रेसका नेता तथा राज्यमन्त्री उमेश श्रेष्ठ पनि चुनावी मैदानमा छन् । श्रेष्ठ नेकपा माओवादी केन्द्र, नेकपा एकीकृत समाजवादी र राष्ट्रिय जनमोर्चा सहितको गठबन्धनबाट उम्मेदवार बनेका हुन्। चितवनका लागि उनी नयाँ अनुहार हुन् । व्यापारिक पृष्ठभूमिका श्रेष्ठले शिक्षा, घरजग्गा र जलविद्युतमा लगानी गरेका छन् ।

राज्यमन्त्री श्रेष्ठले चितवनमा पर्यटन तथा स्वास्थ्य क्षेत्रमा लगानी गरेका छन्।  यो क्षेत्रमा इच्छाकामना गाउँपालिका, कालिका नगरपालिका र भरतपुर महानगरपालिकाका १० वटा वडा पर्छन्।  इच्छामनकामना गाउँपालिका र कालिका नगरपालिकामा स्थानीय चुनावमा एमालेले जितेको थियो । एमालेको पकड रहेको क्षेत्र अनि स्वतन्त्र पार्टीका चर्चित उम्मेदवार रवि लामिछानेलाई पाखा लगाएर चुनाव जित्न श्रेष्ठलाई सजिलो देखिन्न ।

चितवन-२ मा राष्ट्रिय स्वतन्त्र पार्टीका लामिछाने पनि बलियो उम्मेदवारको रुपमा प्रस्तुत भएका छन् । यसअघि काठमाडौं वा प्रचण्डको निर्वाचन क्षेत्रबाट चुनाव लड्ने बताउँदै आएका लामिछाने अन्तिममा चितवन क्षेत्र नम्बर-२ मा पुगे । चितवनसँग आफ्नो विशेष सम्बन्ध रहेको बताउँदै आएका उनले एमाले र गठबन्धनबाट सहज प्रतिस्पर्धी भने पाएका छैनन् ।

पत्रकार शालिकराम पुडासैनी आत्महत्याको घटनामा पक्राउ परेर चितवन पुर्‍याइँदा उनको रिहाइको लागि र पछि समर्थनमा उर्लेको जनसमर्थनलाई नै उनले जितको आधार भन्ने गरेका छन् । तर एउटा घटना विशेषका बेला आएका मान्छे हेरेर मात्रै परिणाम आँकलन गर्न सकिँदैन ।

लामिछानेले आइतबार उम्मेदवारी दिएपछि लेखेको फेसबुक स्टाटसमा पनि आफू पक्राउ पर्दा जम्मा भएको भिडभाडलाई जितको आधार बनाएको जस्तो संकेत देखिन्छ ।  उनले लेखेका छन्, “एउटा समय यस्तो थियो जब मलाई झुक्याएर राता रात भरतपुर चितवन पुर्‍याइयो र आधा रातमा हिरासतमा कोचियो। म आँखामा अन्योल र आँसु बोकेर चितवन आएको थिएँ। अर्को समय आज छ, जहाँ म आफ्नै इच्छा र चाहनाले आँखा भरी सपना र समाज परिवर्तनको योजना बोकेर चितवन नै आएको छु । यसपटक म नफर्कने गरेर आएको छु । म चितवनले लगाएको गुण तिर्न चाहन्छु,जीवन भर चितवनको मान्छे बनेर। मंसिर ४ का लागि चितवन- २ मेरो निर्वाचन क्षेत्र र चुनाव चिन्ह घण्टी।”

यो क्षेत्रमा तीनवटै उम्मेदवार बलियो देखिन्छन् । अब हेर्नुछ चितवन -२ ले लामिछानेलाई उतै राख्छ कि फिर्ता पठाउँछ ।