बहराइन उड्यो नेपाली यू–२० फुटबल टोली

एसेन्स श्रेष्ठ

काठमाडौँ । एएफसी यू–२० एसियन कप छनौटमा प्रतिस्पर्धा गर्न नेपाली फुटबल टोली बहराइन उडेको छ । नेपाली यू–२० टोली बिहीबार बहराइन गएको हो । अखिल नेपाल फुटबल संघ एन्फाले बुधबार टोलीलाई बिदाई गरेको थियो ।

नेपाल, कतार, बहराइन, भुटान र बंगलादेश समूह ‘बी’ मा रहेका छन् । समूह चरणका खेलहरू सेप्टेम्बर १० देखि १८ सम्म सञ्चालन हुनेछ ।

छनोटअन्तर्गत नेपालको पहिलो खेल भुटानसँग सेप्टेम्बर १० मा हुनेछ । सेप्टेम्बर १२ मा हुने खेलमा नेपाल र कतार भिड्नेछन् । नेपालको तेस्रो खेल भने आयोजक बहराइनसँग सेप्टेम्बर १४ मा रहेको छ । सेप्टेम्बर १८ मा बंगलादेश र नेपाल प्रतिस्पर्धा गर्नेछन् ।

समूह विजेताले सन् २०२३ को यू–२० एसिया कपमा स्थान पक्का गर्नेछ । सो प्रतियोगिता उज्वेकिस्तानमा आयोजना हुनेछ ।