नासाले चन्द्रमामा रकेट प्रक्षेपणका लागि पुनः तयारी थाल्यो

संयुक्त राज्य अमेरिका । अमेरिकी अन्तरिक्ष निकाय (नासा)ले अन्तरिक्ष यात्रीले आरोहण गर्नुअघि नै परीक्षण उडानका लागि चन्द्रमामा रकेट पठाउने तयारी गरेको छ ।

यसै साता दोस्रो पटक प्रक्षेपण टोलीले नासाले निर्माण गरेको अहिलेसम्मकै सबैभन्दा शक्तिशाली ३२२ फिट (९८ मिटर) लामो रकेटमा करिब १० लाख ग्यालन इन्धन लोड गर्न सुरु गरेको थियो । खराब इन्जिन सेन्सर र इन्धन चुहावटका कारण सोमबारको प्रयास रोकिएको थियो ।

नासाको प्रक्षेपण कन्ट्रोल समूहका अनुसार जब सूर्य उदायो, अत्यधिक दबाबको घण्टी बज्यो र इन्धन लोड गर्ने कार्य केही समयका लागि रोकियो, तर कुनै क्षति भएन र प्रयास पुनः सुरु भएको छ ।

नासाले चन्द्रमाको वरिपरि रकेटमाथि ‘क्रु क्याप्सुल’ पठाउन चाहेको छ, जसले अन्तरिक्ष यात्रीहरू अर्को उडानमा पुग्नु अघि यसलाई सीमामा धकेल्छ । यदि परीक्षण डमीसहितको पाँच हप्ताको ‘पूर्वाभ्यास’ सफल भयो भने अन्तरिक्ष यात्रीले सन् २०२४ मा चन्द्रमाको परिक्रमा गर्न सक्नेछन् र सन् २०२५ मा चन्द्रमामा अवतरण गर्न सक्नेछन् । मानिसहरु ५० वर्ष पहिले अन्तिम पटक चन्द्रमामा पाइला टेकेका थिए ।

सोमबार एउटा सेन्सरले चारवटा इन्जिनमध्ये एउटा निकै न्यानो भएको सङ्केत गरेको थियो तर पछि इन्जिनियरहरूले यो निकै चिसो भएको पुष्टि गरेका थिए । प्रक्षेपण टोलीले यस पटक समस्यापूर्ण सेन्सरलाई बेवास्ता गर्ने र प्रत्येक मुख्य इन्जिन ठीकसँग चिसो भएको सुनिश्चित गर्न अन्य उपकरणहरूमा भरोसा गर्ने योजना बनाएको थियो ।

प्रज्वलित गर्नुअघि मुख्य इन्जिनहरू माइनस–४२० डिग्री फरेनहाइट (माइनस–२५० डिग्री सेल्सियस) मा प्रवाहित तरल हाइड्रोजन ईन्धनजत्तिकै चिसो हुनुपर्छ । यदि होइन भने, परिणामी क्षतिले अचानक इन्जिन बन्द हुन सक्छ र उडान रद्द गर्न सक्छ ।

झण्डै ४.१ अर्ब अमेरिकी डलरको यो परीक्षण उडान नासाको नयाँ चन्द्र अन्वेषण कार्यक्रमको पहिलो चरण हो । ग्रीक पौराणिक कथामा अपोलोकी जुम्ल्याहा बहिनी आर्टेमिसको नाममा दिइएको यो उडान सफल हुनेमा नासा विश्वस्त देखिन्छ ।

नासाको अपोलो कार्यक्रमका क्रममा १२ जना अन्तरिक्ष यात्रीले चन्द्रमामा पाइला टेकेका थिए । एपी