नयाँ टिपर दर्ता गर्दा ५० प्रतिशत छुट पाइने

काठमाडौं । बागमती टिपर व्यवसायी संघले नयाँ टिपर तथा मिनी टिपरहरू दर्ता गर्दा ५० प्रतिशत छुट दिने निर्णय गरेको छ । बागमती टिपर व्यवसायी संघमा टिपर तथा मिनी टिपरहरू दर्ता गर्न छुट दिइने भएको हो ।

संघको फागुन २८ गते बसेको बैठकले यसरी दर्ता गर्दा ५० प्रतिशत छुट दिने निर्णय गरेको बागमती टिपर व्यवसायी संघका अध्यक्ष सुरेश खत्रीले जानकारी दिए ।

उनका अनुसार संघले  सम्पूर्ण टिपर तथा मिनी ट्रक धनीहरूलाई संघमा दर्ताका लागि आउन आव्हान समेत गरेको छ । उनले अगामी चैत ३० गतेसम्म दर्ता गर्न सकिने जानकारी दिए ।

दर्तामा छुट गरेसँगै व्यवसायीहरूले टिपर दर्ता गर्दा सात हजार पाँच सय रुपैयाँ तिर्नुपर्ने भएको छ । त्यस्तै मिनी टिपर दर्तामा भने तीन हजार सात सय पचास रुपैयाँ तिर्नुपर्ने जनाइएको छ ।

सडक सुरक्षा, व्यवसायीहरूको हक, हित संरक्षण, दुर्घटना न्यूनीकरण गर्ने उद्देश्यका साथ २०६६ सालमा स्थापना भएको बागमती टिपर व्यवसायी संघमा हालसम्म टिपर र मिनी टिपर गरेर एक हजार भन्दा बढी संख्यामा दर्ता भएका छन् ।

अध्यक्ष खत्रीले अरनिको राजमार्ग भएर चल्ने टिपर तथा मिनी टिपरहरूलाई लक्षित गरेको यस्तो व्यवस्था गरिएको बताए ।

साथै अरनिको राजमार्ग भएर चल्ने टिपर तथा मिनी टिपरहरू संघमा आबद्ध नहुँदा दुर्घटनाको दर बढ्दै गएको र दुर्घटनापछि उपचार लगायतमा घाइतेहरूले अनेकौं समस्याहरू भोग्नुपरेको अवस्थालाई मध्यनजर गर्दै दर्ताका लागि आव्हान गरिएको उनको भनाई छ ।

कतिपय टिपर तथा मिनी टिपरहरू दुर्घटनापछि भाग्ने गरेको र त्यसको दोष समेत बागमती टिपर व्यवसायी संघलाई लाग्ने गरेको भन्दै यस्ता समस्याहरूको समाधान गर्ने उद्देश्यले सो योजना अघि सारेको संघले जनाएको छ ।