भोजपुरमा ओलीलाई खुकुरी उपहार

काठमाडौं । झुलाघाट–चिवाभन्ज्याङ यात्राका क्रममा भोजपुर पुगेका नेकपा एमालेका अध्यक्ष केपी शर्मा ओलीले खुकुरी उपहार पाएका छन् ।

यात्राअन्तर्गत भोजपुरको तिवारीभञ्ज्याङमा आयोजित जनभेटघाट कार्यक्रममा पौवादुङ्वा गाउँपालिकाका अध्यक्ष किरण राईले अध्यक्ष ओलीलाई खुकुरी उपहार दिएका हुन् ।

भोजपुर खुकुरीका लागि प्रसिद्ध भएकाले गाउँपालिकाको तर्फबाट एमाले अध्यक्ष ओलीलाई खुकुरी उपहार दिइएको हो ।

उक्त जनभेटघाट कार्यक्रममा एमाले अध्यक्ष ओलीले एमाले सरकारबाट बाहिरिएसँगै देशमा बर्बादीको सुरुवात भएको बताएका छन् ।

देशी विदेशी शक्तिले षड्यन्त्रपूर्वक एमालेको सरकार ढालेको दाबी गर्दै उनले फेरि पनि देशलाई अघि बढाउन एमाले नेतृत्वको सरकार आवश्यक रहेको बताए ।

उनले अहिलेको सरकारसँग सत्तासाझेदार दल नेपाली कांग्रेस नै आजित भइसकेको बताएका छन् । उनका अनुसार कांग्रेसका नेताहरुले नै २०८४ सालसम्म कुर्न नसकिने बताइरहेका छन् ।