गैरआवासीय नेपालीलाई नागरिकता वितरण सुरू, कुल आचार्यले पाए पहिलो नागरिकता

काठमाडौं। प्रधानमन्त्री पुष्पकमल दाहाल ‘प्रचण्ड’ले गैरआवासीय नेपालीहरुलाई नागरिकता वितरणको शुभारम्भ गरेका छन् ।

प्रधानमन्त्री दाहालले प्रधानमन्त्री निवास बालुवाटारमा आज बिहान गैर आवासीय नेपाली संघका अध्यक्ष कुल आचार्यलाई नागरिकता प्रदान गरेर नागरिकता वितरण कार्यको शुभारम्भ गरेका हुन् ।

आचार्यले असोजको २८ गते पर्वतबाट नागरिकता लिएका थिए । पर्वतका प्रमुख जिल्ला अधिकारीले प्रधानमन्त्री र प्रधानमन्त्रीले आचार्यलाई नागरिकता गरे । गत जेठमा नागरिकतासम्बन्धी ऐन संशोधन भएपछि गैरआवासीय नेपालीले नागरिकता पाउने बाटो खुलेको हो ।

नागरिकता प्राप्त गरेपछि उनीहरूले ईश्वर, देश र जनताको नाममा शपथ लिनुपर्ने छ।

आज नागरिकता प्रधान गर्दै प्रचण्डले संविधानमा व्यवस्था भएपश्चात् पनि कानुनी व्यवस्था गर्न ढिलो हुँदा गैर आवासीयले नागरिकता नपाएको तर निकै ठूलो संघर्ष र मेहेनतपछि सफलता हासिल गरेको बताए ।

‘पचासौं लाख गैरआवासीय नेपालीहरूले गैरआवासीय नेपाली नागरिकता प्राप्त गर्ने प्रबन्ध गरिएको छ, यो निकै ठूलो उपलब्धी हो ।’ प्रधानमन्त्री प्रचण्डले भने ।

गैरआवासीय नेपालीसँग सम्बधित थुप्रै सवालहरूलाई आफू नेतृत्वको सरकारले नीति तथा कार्यक्रम र बजेटबाट सम्बोधन गरेको उनको दाबी छ।

‘नेपाल सरकारले विदेशी लगानीको न्यूनतम सीमा रू ५ करोडबाट घटाएर रू २ करोड कायम गरेको छ । धितोपत्रको दोस्रो बजारमा गैरआवासीय नेपालीहरूको लगानी खुला गर्न कानुनी व्यवस्था मिलाइएको छ । यसैगरी वैदेशिक रोजगारीमा रहेका श्रमिकहरूलाई सामाजिक सुरक्षा कोषमार्फत् योगदानमा आधारित सामाजिक सुरक्षाको दायरामा आवद्ध गर्ने निर्णय लागू भइसकेको छ । यो एउटा ऐतिहासिक काम भएको छ जस्तो लाग्छ ।’ प्रधानमन्त्री प्रचण्डले भने ।

प्रधानमन्त्री प्रचण्डले गैरआवासीय नेपाली संघको राष्ट्रिय महाधिवेशनले एकतावद्ध संघ र बलियो नेतृत्व छनोट गर्नेछ  र संघ थप एकतावद्ध भएर अगाडि बढ्नेछ भन्ने विश्वास व्यक्त गरेका छन् ।