नागरिक उड्डयन प्राधिकरणले चालु आवका लागि ल्यायो ३६ अर्ब ६६ करोडको अनुमानित बजेट

काठमाडौं। नेपाल नागरिक उड्डयन प्राधिकरणले चालु आवका लागि ३६ अर्ब ६६ करोड रुपैयाँ बराबरको अनुमानित बजेट ल्याएको छ ।

बजेट ल्याउन केही ढिला भए पनि प्राधिकरण सञ्चालक समितिले मंगलबार आर्थिक वर्ष २०८०/८१ बजेट पास गरेको हो । यद्यपि, साउन १  गतेदेखिकै कार्यक्रमका लागि बजेट कार्यान्वयनमा जाने भएको हो ।

प्राधिकरणले गत आर्थिक वर्ष २०७९/८० को तुलनामा यो वर्ष बजेट ५ अर्ब १९ करोड रुपैयाँ कम ल्याएको छ ।

प्राधिकरणका प्रवक्ता जगन्नाथ निरौलाका अनुसार अन्तर्राष्ट्रिय स्तरका दुईवटा विमानस्थल गौतमबुद्ध र पोखरा विमानस्थलको निर्माण कार्य सम्पन्न भइसकेकाले यो वर्ष केही बजेट घटाइएको हो । हालसम्म नेपालको हवाई क्षेत्रमा काम गर्ने एउटै निकायको रूपमा रहेको नागरिक उड्डयन प्राधिकरणले नै हवाई सञ्चालन, नियमन र विमानस्थल पूर्वाधारको विकास निर्माण आफैँले गर्दै आएको छ ।

चालु आर्थिक वर्षका कुल ३६ अर्ब ६६ करोड रुपैयाँ बराबरको बजेट ल्याएको प्राधिकरणले त्रिभुवन अन्तर्राष्ट्रिय विमानस्थलसहित देशभरका विमानस्थलबाट १५ अर्ब ८८ करोड रुपैयाँ आम्दानी गर्ने जनाएको छ । थप नेपाल सरकारबाट सेयरबापत प्राप्त गर्ने र ऋण बापतको समेत गरी ६ अर्ब ६४ करोड विनियोजन भइसकेको छ ।

हाल प्राधिकरणको विभिन्न बैंक तथा वित्तीय संस्थामा गरी ६ अर्ब ७ करोड बैंक मौज्दात रहेको प्राधिकरणले जनाएको छ । यता सरकारबाट मूल्य अभिवृद्धि करबापत फिर्ता पाउनुपर्ने २ अर्ब ३४ करोड रुपैयाँ र २०८० साउन १ को पेस्कीबापतको मौज्दात रकम ४ अर्ब ८५ करोड गरी ३६ अर्ब ६६ करोड रुपैयाँ स्रोत भर्ना हुने प्राधिकरणको भनाइ छ ।

यस्तै, यो वर्ष प्राधिकरणले विमानस्थल पूर्वाधार तथा विकास निर्माणमा १९ अर्ब खर्च गर्ने जनाएको छ । दैनिक कार्य सञ्चालन तथा कर्मचारी अवकाश र चालु खर्च शीर्षकमा प्राधिकरणले ४ अर्ब ९९ करोड रुपैयाँ विनियोजन गरेको छ ।

प्राधिकरणले सरकारलाई लाभांशबापत २९ करोड कर, कर्मचारीलाई बोनसबापत ५ करोड ८९ लाख वितरण, आयकर व्यवस्थामा २ अर्ब १३ करोड, स्थिर सम्पत्ति प्रतिस्थापन कोषमा १ अर्ब ६३ करोड र वायु यान सञ्चालन कोषको ननअपरेटिभ खातामा ८२ करोड गरी ३६ अर्ब ६५ करोड उपयोग (व्यय) तर्फ विनियोजन गरिएको समेत जनाएको छ ।