सुर्खेत। कार्यालय स्थापना भएको तीन वर्षपछि रुकुम पश्चिमको चौरजहारीबाट सवारी चालक अनुमति पत्र (लाइसेन्स) दिन थालिएको छ । चौरजहारी यातायात व्यवस्था सेवा कार्यालयबाट सवारी चालक अनुमतिपत्र आइतबारबाट दिन थालिएको हो ।
कार्यालय स्थापना भएको तीन वर्षपछि पहिलो सेवाग्राहीका रूपमा आठबीसकोट नगरपालिकाका सुदीप ओलीले सवारी चालक अनुमति पत्र पाएका हुन् ।
लाइसेन्सका लागि साउन २ गतेदेखि अनलाइन फारम खुला भएको थियो । अनलाइन फारम भरेकाहरूको बायोमेट्रिक सुरु भएको यातायात व्यवस्था सेवा कार्यालय चौरजहारीका प्रमुख आनन्द चपाईंले बताए ।
‘बायोमेट्रिकपछि लिखित परीक्षा सञ्चालन हुने र त्यसपछि ट्रायल हुन्छ ।’ उनले भने,‘अहिलेलाई ट्रायल सेन्टर भाडामा लिइएको छ । अब चौरजहारीबाटै मोटरसाइकल, कार, जिप, भ्यान, स्कुटर र अटो रिक्साको सवारी चालक अनुमतिपत्र पाइनेछ ।’
२०७६ साल भदौ १२ गते चौरजहारीमा यातायात व्यवस्था सेवा कार्यालयको शाखा उद्घाटन गरिएको थियो । कर्मचारी अभाव लगायतका कारण देखाउँदै उद्घाटन भएको साढे ३ वर्षसम्म कार्यालय अलपत्र परेको थियो ।
कार्यालयले अब सवारी दर्ता, नामसारी, कर असुल, ब्लुबुक नवीकरण, लाइसेन्स नवीकरण, रुट परमिट जारी, सवारी जाँचपास लगायतका सेवा दिइरहेमा अब सवारी चालक अनुमतिपत्र जारी गर्ने भएको छ ।
Facebook Comment
Comment