रियल मड्रिडबाट बेन्जिमाको सुखद बिदाई, अन्तिम खेलमा गरे गोल

एजेन्सी। स्पेनिस क्लब रियल मड्रिडबाट चर्चित खेलाडी करिम बेन्जिमाको सुखद बिदाइ भएको छ । अन्तिम खेलमा उनले गोल गरेर रियलको यात्रा सुखद अन्त्य गरेका छन् ।

आइतबार राति भएको सिजनको आफ्नो अन्तिम खेलमा रियलले बिल्बाओसँग १-१ गोलको बराबरी खेलेको हो । बिदाइ खेल खेलेका स्ट्राइकर करिम बेन्जिमाले गोल गरेपछि रियल हारबाट जोगिएको हो ।

बेन्जिमाले १४ वर्षपछि रियल छाड्ने घोषणा गरिसकेका छन् । उनले खेलको ७२ औं मिनेटमा पेनाल्टी मार्फत गोल गरेका थिए ।

रियलले दोस्रो स्थानमा रहदै सिजनको अन्त्य गरेको छ । यो सिजनको अत्न्यसँगै  करिम बेन्जिमाले रियलसँगको यात्रा पनि टुंग्याएका छन् । बेन्जेमाको बिदाइ समारोहमा मङ्गलवार विशेष कार्यक्रम राखिएको क्लबले जनाएको छ ।

बेन्जेमा सन् २००९ मा रियल मड्रिडमा आबद्ध भएका थिए । उनी रियलबाट सर्वाधिक गोल गर्ने खेलाडीको दोस्रो नम्बरमा छन् । उनले तीन सय ५३ गोल गरेका छन् ।

रियलबाट सर्वाधिक गोलकर्ता क्रिन्टियानो रोनाल्डोले चार सय ५० गोल गरेका छन् । बेन्जेमाले ला लिगा चार पटक, च्याम्पियन्स पाँच पटक र सन् २०२२ मा बालेन जिओर जितेका छन् ।