चिनियाँ कम्युनिष्ट पार्टीका विदेश विभाग प्रमुख नेपाल आउँदै

काठमाडौं। चिनियाँ कम्युनिष्ट पार्टीका नवनियुक्त विदेश विभाग प्रमुख लिउ जियान चाओ नेपाल भ्रमणमा आउने भएका छन्। लिउ आइतबार चार दिने नेपाल भ्रमणमा आउन लागेका हुन्। लिउले विदेश विभाग प्रमुखको जिम्मेवारी सम्हालेलगत्तै पहिलोपटक नेपाल आउन लागेका हुन्।

लिउको नेपाल भ्रमणबारे परराष्ट्र मन्त्रालय स्रोतले पुष्टि गरे पनि काठमाडौंस्थित चिनियाँ राजदूतावासले भने केही बताएको छैन। नेपालमा आम निर्वाचनको तयारी चलिरहेका बेला चिनियाँ कम्युनिष्ट पार्टीको शीर्ष नेतृत्वको भ्रमण हुनुलाई कूटनीतिक वृत्तमा अर्थपूर्ण रुपमा लिइएको छ।

चिनियाँ कम्युनिष्ट पार्टीको विदेश विभाग प्रमुखमा नियुक्त भएलगत्तै लिउ जियानले केही दिनअघि नेपालका राजनीतिक दलका शीर्ष नेताहरूसँग छुट्टाछुट्टै भर्चुअल संवाद गरेका थिए।

लिउले असार ९ गते माओवादी केन्द्रका अध्यक्ष पुष्पकमल दाहाल प्रचण्ड, असार १० गते एमाले अध्यक्ष केपी शर्मा ओली र असार १६ गते परराष्ट्रमन्त्री नारायण खड्कासँग बेइजिङबाट भर्चुअल संवाद गरेका थिए।

चीनले पछिल्ला वर्ष नेपालका कम्युनिष्ट पार्टीहरूलाई प्राथमिकता राख्दै आएको छ।