मधेश प्रदेशसभाको बैठक बस्दै, बजेटको तयारी

जनकपुरधाम। मधेश प्रदेश प्रदेशसभाको नवौँ अधिवेशन आजदेखि शुरु हुँदैछ। आगामी आर्थिक वर्ष २०७९/८० को नीति तथा कार्यक्रम र बजेट ल्याउनुपर्ने भएकाले प्रदेशसभाको नवौँ अधिवेशन शुरु हुन लागेको हो।

आज दिउँसो १ बजे प्रदेशसभाको बैठक बस्ने प्रदेशसभा सचिवालयले जनाएको छ। बैठकमा नवौँ अधिवेशन आह्वानसम्बन्धी प्रदेश प्रमुख कार्यालयबाट प्राप्त पत्र सभामुखले वाचन गरी सुनाउने र विभिन्न पार्टीका संसदीय दलका नेताले मनतव्य राख्ने कार्यसूची रहेको प्रदेशसभा सचिवालयका सचिव रञ्जितकुमार यादवले जानकारी दिए।

यस्तै, केही दिनअघि निधन भएका प्रदेशसभा सदस्य डिम्पलकुमारी झाको शोकप्रस्ताव आजको बैठकमा पेश गरिने कार्यसूची रहेको छ।

यही अधिवेशनअन्तर्गत मधेश प्रदेश सरकारले २२ जेठमा आर्थिक वर्ष २०७९/८० को नीति तथा कार्यक्रम प्रदेशसभामा प्रस्तुत हुने प्रदेशसभा सदस्यलाई जानकारी गराउने कार्यसूची रहेको प्रदेशसभा सचिवालयले जनाएको छ।

प्रदेशसभा बैठकमा प्रदेश प्रमुख हरिशङ्कर मिश्रले प्रदेश सरकारको नीति तथा कार्यक्रम प्रस्तुत गर्नेछन्। यस्तै, मधेश प्रदेश सरकारले आगामी १ असारमा आर्थिक वर्ष २०७९/८० को बजेट प्रस्तुत गर्ने तयारी छ।

नीति तथा कार्यक्रमपश्चात् प्रदेश सरकारले आगामी १ असारमा बजेट प्रदेशसभामा पेश गर्नुपर्ने संवैधानिक व्यवस्था छ। २९ चैत २०७८ मा प्रदेशसभाको आठौँ अधिवेशन अन्त्य भएको थियो।