कंंगोमा बम बिस्फोट हुँदा ६ जनाको मृत्यु, १५ घाइते

नेपालभ्युज

एजेन्सी। कंगोको एक रेष्टुरेन्टमा भएको विस्फोटमा परी ज्यान गुमाउनेको संख्या ६ पुगेको छ। कंगोको उत्तरी किभु प्रान्तको एक रेष्टुरेन्टको बारमा सो बिस्फोट भएको थियो। बिहीबार साँझ भएको सो बिस्फोटमा परेर अरु १५ जना घाइते भएका छन्।

घाइतेहरुमध्ये अधिकांशको अवस्था गम्भीर रहेको पनि बताइएको छ। सो विस्फोटका कारण रेष्टुरेन्टमा पनि ठूलो क्षति पुगेको छ।कंगोका सञ्चार तथा मिडिया मन्त्री प्याट्रिक मुइयाले सो जानकारी दिएका छन्। उनले भनेका छन्,” घाइतेहरुको अवस्था गम्भीर छ, बिस्फोटका बारेमा हामीले अनुसन्धान गरिरहेका छौँ।

सो बिस्फोट कसले र किन गराएको हो भन्ने बारेमा अहिले नै केही पत्ता नलागेको जानकारी पनि उनले दिए।मन्त्री मुइयाले शान्तपूर्वक बस्न नागरिकलाई आग्रह गरेका छन्।

यस विषयमा अनुसन्धान जारी रहेकाले अहिले नै सो विस्फोटबारे केही भन्न नसकिएको उनले बताए।