पूर्वराजाको स्वागतमा ठुलो जुलुस निकाल्न सफल ज्ञानेन्द्र शाहीको दाबी– जुम्ली जनता राजतन्त्रको पक्षमा

काठमाडौं । शनिबार पूर्वराजा ज्ञानेन्द्र शाह जुम्ला पुग्दा नसोचेको भीड जम्मा गर्न सफल भएपछि जुम्लाका सांसद ज्ञानेन्द्र शाही उत्साहित भएका छन् । नागरिक अभिनन्दन भन्दै पूर्वराजा शाहलाई लगिएपछि राजाबादीहरूले गाउँगाउँबाट सर्वसाधारणलाई ल्याएका थिए ।

सडक पुग्ने सबैजसो ठाउँबाट सर्वसाधारणलाई ल्याइएको थियो । जसकारण सदरमुकाम खलंगामा नसोचेको भिड जम्मा भएको थियो ।

जनप्रदर्शनका पछाडि मुख्य भूमिका आफ्नै रहेको राप्रपाका प्रवक्ता ज्ञानेन्द्र शाहीले बताएका छन् । आफ्नै पहल र संयोजनमा पूर्वराजाको जुम्ला भ्रमण तय भएको बताउँदै उनले जुम्ली जनता राजसंस्थाको पक्षमा रहेको दाबी गरेका छन् ।

उनी भन्छन्, ‘हजाराैँ हजार मानिस मानिसहरू राजाको अभिनन्दन कार्यक्रममा उपस्थित भए । जुम्ली जनता राजसंस्थाको पक्षमा छन् ।’

जुम्लाको प्रदर्शनले देशभरमा ठूलो सन्देश गएको शाहीको भनाइ छ । कतिपयले भने जुम्लाभन्दा बाहिरका जिल्लाबाट समेत मानिसहरू प्रदर्शनमा लागिएको बताएका छन् ।