धनुषाको हंसपुर प्रहरी कार्यालयमा तनाव, प्रहरीले गोली चलाउँदा एक घाइते

जनकपुरधाम। धनुषाको हंसपुरमा प्रहरीले चलाएको गोली लागेर एक व्यक्ति घाइते भएका छन् । प्रहरीको गोली लागेर स्थानीय शंकर मण्डल घाइते भएका हुन् । उनको हातमा गोली लागेको छ ।

उनलाई उपचारका लागि जनकपुर लगिएको छ । प्रहरी कार्यालयमा हिजो साँझ भएको छलफलका क्रममा झडप हुँदा स्थानीय दीपनारायण मण्डलको टाउकोमा गम्भीर चोट लागेको थियो ।

६५ वर्षिय मण्डको उपचारका क्रममा मृत्यु भएपछि स्थानीयवासी आक्रोशित हुँदै प्रहरी कार्यालय तोडफोडमा उत्रिएका हुन् । सयौंका संख्यामा रहेका स्थानीयले प्रहरी कार्यालयमा ढुंगामुढा गरेपछि भिड नियन्त्रण गर्न गोली चलाउनु परेको प्रहरीले जनाएको छ ।

जिल्ला प्रहरी कार्यालय धनुषाका अनुसार चोरीको विषयमा स्थानीय दुई पक्षबीच प्रहरी कार्यालयमै झडप भएको थियो । सोही झडपका क्रममा घाइते भएका स्थानीयदीपनारायण मण्डलको उपचारका क्रममा राति मृत्यु भएको प्रहरीको भनाई छ ।

चोरीको विषयमा विवाद भएपछि प्रहरी कार्यालयमा ल्याएर दुवै पक्षलाई छलफल समेत गराइएको थियो ।

स्थिति तनावग्रस्त भएपछि जिल्ला प्रहरी कार्यालयबाट एसपीको नेतृत्वमा टोली घटनास्थलतर्फ पठाइएको प्रदेश प्रहरी कार्यालयले जनाएको छ ।