भारतीय मालवाहक गाडी रोक लगाउन ट्रक व्यवसायीको माग

नेपालभ्युज

काठमाडौं। नेपाल ट्रक यातायात व्यवसायी महासंघले नेपालमा रहेका भारतीय मालवाहक गाडी रोक लगाउनुपर्ने माग गरेको छ ।

महासंघले सोमबार काठमाडौंमा पत्रकार सम्मेलन गरेर भारतीय मालवाहक गाडीका कारण नेपालमा गाडीले काम नपाउने स्थिति बनेको भन्दै यस्तो माग गरेको हो । महासंघले निर्बाध रूपमा आउने भारतीय गाडीमाथि स्थायी ढंगबाट रोक लगाउनुपर्ने बताएको छ ।

त्यस्तै, ट्रक व्यवासायीले काठमाडौं लगायतका प्रमुख ठाउँमा पार्किङ स्थलको उचित व्यवस्थापनको माग पनि गरेका छन् । महासंघका महासचिव राजेन्द्रविक्रम बानियाँले निर्धारित भाडादरको कार्यान्वयन हुनुपर्ने बताए ।

ट्रक यातायातमा ४७ वटा मुख्य रुटको भाडादर निर्धारण गरेको र त्यसको प्रभावकारी कार्यान्वयन नभएको बताउँदै उनले अनुगमन प्रभावकारी बनाउनसमेत आग्रह गरे ।