त्रिचन्द्र,रत्न राज्य,पृथ्वीनारायण र ल क्याम्पस समेत १२ आंगिक क्याम्पसमा स्ववियु निर्वाचन नहुने !

काठमाडौं। त्रिभुवन विश्वविद्यालयले उपत्यका भित्रका ४ सहित स्ववियु निर्वाचन हुन बाँकी रहेका १२ ठुला क्याम्पसहरूमा अब निर्वाचन नगराउने भएको छ।

त्रिभूवन विश्वविद्यालय विद्यार्थी कल्याण तथा खेलकुद निर्देशनालयका अनुसार काठमाडौं उपत्यकाभित्रका मुख्य कलेज नेपाल ल क्याम्पस, त्रिचन्द्र क्याम्पस,विश्वभाषा क्याम्पस र आरआर क्याम्पस सहित पोखराको पृथ्वीनारायण क्याम्पसमा पनि अब स्वतन्त्र विद्यार्थी युनियनको निर्वाचन नहुने भएको छ।

त्रिविको नियमअनुसार तोकिएको मितिमा निर्वाचन नभएका क्याम्पसहरूमा एक महिनाभित्रमा निर्वाचन गराउनुपर्ने हुन्छ । तर, वैशाख ८ गतेसम्म पनि यी क्याम्पसहरूमा निर्वाचन हुन नसकेपछी अब लगभग नहुने अबस्था देखिएको हो।

त्रिविले अब स्ववियु निर्वाचनको सम्पुर्ण कार्य बन्द भइसकेको जनाएको छ ।‘अब बाँकी कलेजमा निर्वाचन गराउन सकिदैंन’–त्रिविस्रोतले भन्यो,‘उपत्यकाका ४ सहित १२ वटा आंगिक क्याम्पसमा स्ववियु निर्वाचन हुन बाँकी छ। अब हुँदैन।’

उपत्यका भित्रका ४ बाहेक बाहिरका पृथ्वीनारायण क्याम्पस पोखरा, ठाकुरराम बहुमुखी क्याम्पस वीरगन्ज लगाएत ८ क्याम्पस अब स्ववियु विहीन हुनेछ । परीक्षा चलिरहेका कारण र पठनपाठन समेत प्रभावित हुनेभएपछी निर्वाचन नगराउने पक्षमा त्रिवि पुगेको हो।

चैत ५ गते निर्वाचन हुनुपर्ने क्याम्पसमा विद्यार्थी सङ्गठनहरू कारण स्ववियु निर्वाचन हुन सकेको थिएन । तीमध्ये केही क्याम्पसमा विभिन्न मितिमा निर्वाचन भयो । तर,केही क्याम्पसको विवाद अदालतसम्म पनि पुगेपछी लम्बिएको थियो। उद्यपि ठुला पार्टी निकट चार विद्यार्थी संगठनले चैत ३० गते बाँकी रहेका क्याम्पसहरूमा निर्वाचन गराउने सहमति गरेका थिए तर,निर्वाचन हुन सकेन।