संघीय संसदका ३१३ र प्रदेशका ५१८ सांसदले मतदान गरे

काठमाडौं। राष्ट्रपति निर्वाचनको मतदान सकिएको छ। मतगणना  अपराह्न ३:३० बजेबाट हुने निर्वाचन आयोगले जनाएको छ ।

निर्वाचन आयोगले सार्वजनिक गरेको तथ्यांकअनुसार संघीय संसदका ३१३ र प्रदेशका ५१८ सांसदले मतदान गरेका छन् ।  राष्ट्रपति उम्मेदवार पौडेलको तर्फबाट रमेश लेखक र सुवास नेम्वाङको तर्फबाट महेश कुमार बर्तौला मतगणनाका लागि प्रतिनिधि खटिएका छन् ।

त्यसैगरी, मतदाता नामावलीमा नाम भए पनि एमाले सांसद लक्ष्मी महतो कोइरी मतदान स्थलमा देखिएनन् । महोत्तरी १ बाट निर्वाचित एमाले सांसद कोइरी फरार सुचीमा छन् । त्यसैगरी, निलम्बनमा परेका कांग्रेस सांसद टेकबहादुर गुरुङ पनि निर्वाचन स्थलमा उपस्थित भएनन्।

राष्ट्रपतिबाट शपथ लिएर उपप्रधानमन्त्री समेत भइसकेका राप्रपा अध्यक्ष राजेन्द्र लिङ्देन पनि भोट दिन गएनन् । अध्यक्ष लिङ्देनसहित उनको पार्टीका सबै सांसद मतदानमा सहभागी नभएको निर्वाचन आयोगले जनाएको छ।

कांग्रेस सांसद चन्द्र भण्डारी भारतमा उपचाररत, माओवादी सांसद वर्षमान पुन चीनमा उपचाररत रहेकाले उनीहरूले पनि मतदान गरेनन्।