सुन व्यवसायीमाथि गोली प्रहार

नेपालभ्युज

काठमाडौं । कैलालीमा सुन व्यवसायीमाथि गोली प्रहार भएको छ । अत्तरियास्थित घोडाघोडी १ बस्ने २८ वर्षीय विकास सुनारमाथी आइतबार साँझ साढे ६ बजे गोली प्रहार भएको प्रहरीले जनाएको छ ।

न्यू घोडाघोडी सुनचाँदी पसल संचालन गर्दै आएका उनी पसल बन्द गरेर घर जाने क्रममा आक्रमणमा परेका हुन् ।

जिल्ला प्रहरी कार्यालय कैलालीका अनुसार अत्तरियायाको पूर्वी सडकमा रहेको सशस्त्र प्रहरी बेस क्याम्प नजिकै मोटरसाइकलमा सवार २ जनाले गोली चलाएका थिए ।

गोली प्रहारबाट सुनारको दाहिने हात र ढाडमा चोट लागेको छ । उनको हाल मायामेट्रो अस्पताल धनगढीमा उपचार भइरहेको छ ।

गोली प्रहार गर्नेहरुको खोजी कार्य भइरहेको प्रहरीले जनाएको छ ।