आयोजना प्रभावितका लागि आईपीओ जारी गर्दै दोर्दी

काठमाडौं। दोर्दी खोला जलविद्युत् कम्पनी लिमिटेडले आयोजना प्रभावित क्षेत्रमा बसोबास गर्ने नागरिकका लागि साधारण शेयर बिक्री खुला गर्ने भएको छ।

कम्पनीले प्रतिकित्ता १०० अङ्कित १० करोड ५४ लाख २६ हजार रुपैयाँ मूल्य बराबरका १० लाख ५४ हजार २६० कित्ता प्रारम्भिक सार्वजनिक निष्काशन (आईपीओ) बिक्री खुला गर्ने भएको हो।

कम्पनीले यही १३ वैशाखदेखि आफ्नो जारी पुँजी एक अर्ब पाँच करोड ४२ लाख ६० हजार ४०० रुपैयाँको १० प्रतिशतले हुने १० करोड ५४ लाख २६ हजार ४०० रुपैयाँ मूल्य बराबरका १०० रुपैयाँ अङ्कित दरका १० लाख ५४ हजार २६० कित्ता शेयर आयोजना प्रभावित क्षेत्रमा पर्ने लमजुङको दोर्दी गाउँपालिकाका स्थायी बासिन्दाका लागि निष्काशन गर्ने सार्वजनिक आह्वानपत्रमा उल्लेख छ।

स्थानीयले यही १३ वैशाखदेखि छिटोमा २७ वैशाखसम्म र सो अवधिमा मागबमोजिम आवेदन नपरे आगामी ११ जेठसम्म न्यूनतम १० कित्तादेखि अधिकतम १० लाख कित्ता शेयर खरिदका लागि आवेदन दिन पाउने छन्।

कम्पनीले हाल दोर्दी भएर बहने दोर्दी खोलाको पानी उपयोग गरी १२ मेगावाट क्षमताको ‘दोर्दी १ जलविद्युत् आयोजना’ निर्माण गरिरहेको छ।

स्थानीयले नेपाल धितोपत्र बोर्डबाट अनुमति प्राप्त आस्वा सेवामा सहभागी बैंक तथा वित्तीय संस्थाबाट आस्वा प्रणालीमार्फत शेयर खरिदका लागि आवेदन दिन सक्नेछन्।

साथै, सिद्धार्थ बैंकको बेंसीशहर शाखा, ग्लोबल आईएमई बैंकको दोर्दी शाखा, कामना सेवा विकास बैंक, मुक्तिनाथ विकास बैंक तथा एनएमबी बैंकको बेंसीशहर शाखाबाट समेत शेयर खरिदका लागि आवेदन दिन सकिने कम्पनीले जनाएको छ।

कम्पनीको धितोपत्र निष्काशन तथा बिक्री प्रबन्धक सिद्धार्थ क्यापिटल लिमिटेड रहेको छ। कम्पनीलाई इक्रा नेपालले ‘इक्राएनपी–आईआर बीबी माइनस’ रेटिङको प्रमाणपत्र प्रदान गरेको छ।