काठमाडौं । पूर्वराजा ज्ञानेन्द्र शाहले देशका सबै जनता एक ठाउँमा उभिने बेला आएको बताएका छन् । बिहीबार भैरहवामा नागरिक अभिनन्दनपश्चात सम्बोधन गर्दै उनले देशको दूरावस्थाप्रति चिन्ता प्रकट गर्दै देशका सबै जनता एक ठाउँमा उभिने बेला आएको बताएका हुन् ।
उनले देशको अहिलेको अवस्थालाई नजिकबाट नियालिरहेको पनि बताए ।
‘आज हामी कताकता हराइरहेका छौं । कताकता आफैं हारिरहेका छौं । म जता जाउँ, जहाँ पुगुँ, जनआवाज उठेको सुन्छु । मलाई आउ हाम्रो देश बनाउ र देश बचाउ, देशको सभ्यता र समृद्धी बढाउ’, उनले भने, ‘ यहाँ उभिएर म भन्दछु । म बोलिरहेछु । देश बनोस, देश बचोस भन्ने आफ्ना पुर्ख्यौली भावना इच्छा आकांक्षा पोखिरहेछु ।’
उनले आफू अन्यत्र कतै नगएको र सधैं नेपालीकै साथमा हुने बताए । ‘म कतै अन्त गएको छैन । सदा–सदा नेपालीको साथमा छु । नेपालभित्रै छु’, उनले भने, ‘भाग्यको सीमा हुँदैन । हुनु पनि हुँदैन । अब भाँचिएका टुक्राहरु जोडिदिउँ ।’
उनी नागरिक अभिनन्दनकै लागि भैरहवा गएका थिए ।
Facebook Comment
Comment