काठमाडौं । कार्यदलको बैठक बिनानिष्कर्ष सकिएको छ ।
आइतबार बिहादेखि सिंहदरबारस्थित कानून, न्याय तथा संसदीय मामिला मन्त्रालयमा बसेको बैठक निष्कर्ष ननिकाली नै सकिएको हो ।
कार्यदलका सदस्य महेशकुमार बर्तौलाले भने, “सहमतिको नजिक पुग्यौँ । बैठक टुङ्गिएको छैन । केही समयमा फेरि बैठक बस्नेछौँ । कांग्रेसले २० मिनेटको लागि समय माग्यो । सहमतिको टाढा पनि छैनौँ, एकाध विषयमा कांग्रेसका आफ्ना भनाइहरू छन् । सहकारी ठगीको विषय टुङ्गियोस् भनेर सबैले भनेका छौँ । बुँदागत रूपमा टुङ्ग्याउनका लागि समय लाग्छ । सम्भवत: एकाध घण्टापछि बस्ने बैठकले टुङ्ग्याउँछ ।”
अहिले प्रमुख प्रतिपक्ष दल नेपाली कांग्रेसका तर्फबाट कार्यदल सदस्य रहेका जीवन परियारलाई पार्टीले बोलाएको छ । कांग्रेसले संसदीय दलको कार्यालयमा छलफल गरिरहेको छ ।
कांग्रेसले उपप्रधान एवम् गृहमन्त्री रवि लामिछानेको नाम संसदीय समितिको टीओआरमै उल्लेख हुनुपर्ने अडान राखेको छ । कार्यदलको बैठकमा पनि कांग्रेसले त्यही अडान राखेको छ ।
नेकपा (एमाले), राष्ट्रिय स्वतन्त्र पार्टी (रास्वपा) लगायतका दलहरू भने लामिछानेको नाम टीओआरमा नै उल्लेख हुनुपर्नेमा सहमत भएका छैनन् ।
कार्यदल बैठकमा कांग्रेसको अडान- टीओआरमै रवि लामिछानेको नाम उल्लेख हुनुपर्छ
Facebook Comment
Comment