सल्यानमा ३७८ जेष्ठ नागरिकको घरमै गएर स्वास्थ्य परीक्षण

सुर्खेत। सल्यानमा ३७८ जना जेष्ठ नागरिकको घरमै गएर स्वास्थ्य परीक्षण गरिएको छ। जिल्लाको कपुरकोट गाउँपालिकामा स्वास्थ्यकर्मीहरुले जेष्ठ नागरिकहरुलाई घरमै गएर भेटघाट र चेकजाँच गरेका हुन्।

गाउँपालिकाको नीति अनुसार नै स्वास्थ्यकर्मीहरुलाई जेष्ठ नागरिकको घरदैलोमा खटाइएको गाउँपालिका अध्यक्ष भिमबहादुर सेनले बताए।

“७० वर्षभन्दा माथिका जेष्ठ नागरिकहरुलाई सम्बन्धित वडा तथा घरदैलोमै गएर चेकजाँच र निःशुल्क औषधि वितरणको व्यवस्था मिलाइएको छ,” सेनले भने, “गाउँपालिकाले २१९ जना महिला र १५९ जना पुरुष जेष्ठ नागरिकको स्वास्थ्य परीक्षण गरेको हो।”

गाउँपालिकाको वडा नम्बर १ मा ६४ जना, २ मा २९ जना, ३ मा ३९ जना, ४ मा ५७ जना ७० वर्ष माथिका जेष्ठ नागरिकलाई चेकजाँच र औषधि वितरण गरिएको स्वास्थ्य शाखाले जनाएको छ।

यस्तै, वडा नम्बर ५ मा ७४ र वडा नम्बर ६ मा एक सय चार जनालाई घरभेटघाट तथा स्वास्थ्य चेकजाँच, परामर्श र औषधि वितरण गरिएको स्वास्थ्य शाखाका सिअहेव सुवास हमालले जानकारि दिए।