सीता भण्डारी मृत्यु प्रकरण : प्रहरीको प्रारम्भिक अनुसन्धानमा देखियो आत्महत्या

बुटवल। रुपन्देहीको तिलोत्तमा नगरपालिका-५ की सीता भण्डारीले आत्महत्या गरेको प्रारम्भिक अनुसन्धानमा देखिएको प्रहरीले जनाएको छ। प्रहरीले उनको मृत्यु प्रकरणबारे अहिलेसम्म भएका अनुसन्धानबारे शुक्रबार जानकारी गराएको हो।

भण्डारी गत २० भदौ बिहान साढे ४ बजे आफ्नै कोठामा झुण्डिएको अवस्थामा मृत फेला परेकी थिइन्। पोष्टमार्टममा ‘झुण्डी मृत्यु भएको’ देखिएको मृत्यु प्रकरणमा सीताका माइती पक्षले हत्या भएको दाबी गर्दै आन्दोलन गरेपछि नेपाल प्रहरीको केन्द्रीय अनुसन्धान ब्युरो(सीआईबी) र इलाका प्रहरीले संयुक्त रुपमा अनुसन्धान गरिरहेका छन्।

जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक सत्यनारायण थापाले मृत्युको कारण आत्महत्या देखिएको बताए। उनले भने, “मृतक र उनका आफन्तले बोक्ने मोबाइलको प्राविधिक विश्लेषण, उनीहरु बीच भएका कुराकानीको टाइमलाइन, सीसीटीभी फूटेज र शव परीक्षण लगायतका कुराले अनुसन्धान आत्महत्यातर्फ डोहोरिएको छ।”

प्रहरीका अनुसार अनुसन्धानका क्रममा मृतक सीता र उनका श्रीमान टीका पौडेलको मोबाइलको प्राविधिक परीक्षण गर्दा सुसाइड नोटसमेत भेटिएको छ।

प्रहरीका अनुसार सीताले आइफोनको ‘नोट एप्लिकेसन’मा लेखेको सुसाइड नोटमा ‘………मलाई माफ गरिदिनुहोला, मेरो अर्को जुनी भयो भने म हजुरहरुकै काखबाट जन्मिन चाहन्छु। मलाई यो जिन्दगीबाट पुग्यो। म सकिनँ बाँच्न’ भनि लेखिएको छ।

प्रवक्ता थापाले भने, “डिजिटल फरेन्सिक ल्याबबाट प्राप्त सुसाइड नोटमा रोमनाइज्ड नेपालीमा लेखिएको एसएमएसको भाषाशैली र तरिका विगतको मृतकको एसएमएससँग मिल्ने देखिएको छ।” उनका अनुसार उक्त सुसाइड नोट आत्महत्या गर्नुअघि २० भदौ साढे १२ बजे लेखिएको छ।

सीताको मृत्युपछि उनका माइती पक्षले हत्या भएको दाबी गर्दै आएका छन्। उनका बुवा हरिप्रसाद भण्डारीले दिएको कर्तव्य ज्यानको किटानी जाहेरी प्रहरीले लिन नमानेपछि २२ भदौमा सीताका श्रीमान् टिका पौडेल, जेठाजु हरिप्रसाद पौडेल र आमजु विष्णु पौडेलविरूद्ध आत्महत्या दुरुत्साहन मुद्दामा जाहेरी दिएका थिए।

जाहेरीपछि प्रहरीले सीताका श्रीमान् पौडेल, आमजु र जेठाजुलाई हिरासतमा लिई आत्महत्या दुरुत्साहन मुद्दामा अनुसन्धान गरिरहेको छ।

मृतक सीता र श्रीमान टिका पौडेलबीच १८ असोज २०७६ मा विवाह भएको थियो। विवाह भएपछि उनीहरू दुवैले पाल्पा जिल्ला धरमपानीस्थित द दरबार रिसोर्ट सञ्चालन गर्दै आएका थिए। प्रहरीले सोही रिसोर्ट बेच्ने कुरामा विगतबाट देखिएको विवाद नै आत्महत्याको कारण भएको बताएको छ।

सीता र उनका पति रिसोर्ट बेच्ने पक्षमा भए पनि उनीहरुका परिवार बेच्न नहुने अडानमा थिए। सोही विवाद उत्कर्षमा पुगेपछि घटना घटेको हुनसक्ने प्रारम्भिक अनुसन्धानमा देखिएको रुपन्देहीका प्रहरी प्रमुख एसपी मनोज केसीले बताए।