श्रीमती बेचेपछि १० वर्ष जेल बसेर छुटेका सम्बरबहादुर उही धन्दामा, पोखरा भन्दै भारत लग्दै थिए किशोरी

काठमाडौं । जेठ २६ गते ललितपुरको चापागाउँ र लेले हुँदै हेटौँडा जाने बाटो (कान्ती राजपथ) मा प्रहरीको चेकिङ थियो । बसमा रहेका दुईजना यात्रुको व्यवहार प्रहरीको टीमलाई ‘शंकास्पद’ लाग्यो ।

एकजना पुरुष थिए । साथमा एक किशोरी थिइन् । किशोरीलाई प्रहरीले उमेर र नाम सोधे । भनिन्, ‘‘मेरो उमेर २१ वर्ष’’ । उमेर २१ जस्ती नदेखिने ती किशोरीलाई फेरि सोधियो, ‘‘नाम के हो ?’’ अब उनी अलमलमा परिन् । साथमा भएको नागरिकता झिकिन् र हेर्दै भनिन्, ‘‘बिना तामाङ ।’’

‘‘आफ्नै नाम भन्न पनि नागरिकता हेर्नुपर्छ ?’’ उनलाई प्रहरीले केरकार थाले । रातोपिरो हुँदै आफूसँगै रहेका पुरुषको मुख हेर्न थालिन् ।

दुवै जनालाई प्रहरीले त्यही रोक्यो । केरकार गर्दा थाहा भयो । हेटौँडा हुँदै वीरगञ्ज र रक्सौल नाका हुँदै भारत छिर्न खोजेका रहेछन् । पुरुषको साथबाट केही भारतीय रुपैयाँ पनि बरामद भयो ।

प्रहरी वृत्त चापागाउँ ल्याइएपछि प्रहरीले प्रश्न सोध्थ्यो । जवाफ दिँदा उनीहरू घरी एकअर्कामा मुखामुख गर्थे, घरी अलमलिन्थे । त्यसमाथि किशोरी र पुरुषले दिएको जवाफ एक अर्कासँग मिलिरहेको थिएन । प्रहरीले उनीहरूलाई पक्राउ परेर बबरमहलस्थित प्रहरीको मानव बेचबिखन अनुसन्धान ब्युरोमा ल्यायो ।

उनी थिए, नुवाकोट दुप्चेश्वर ६ का ३९ वर्षीय सम्बरबहादुर तामाङ र १४ वर्षीय किशोरी । उनको उमेर १४ वर्षको भएकाले नेपालको सीमा कटाउन सजिलो हुने ठानेर अरूको नागरिकता दिइएको रहेछ ।

२०६० साल जन्ममिति रहेको बिना तामाङ नाम भएको सक्कली नागरिकता बोकेकी किशोरीले पछि नागरिकता आफ्नो नभएको बताइन् । उनको उमेर १४ वर्षको भएकाले नेपालको सीमा कटाउन सजिलो हुने ठानेर अरूको नागरिकता दिइएको रहेछ ।

किशोरीले भनिन्, ‘‘बाटोमा चेकजाँच भएमा वास्तविक नाम, थर, ठेगाना नभन्नु । नागरिकतामा भएको नाम भन्नु भनेर सिकाइएको थियो ।’’

उनले आफूलाई पोखरामा होटलमा ‘वेट्रेस’को काममा लगाउन भन्दै लगेको सुनाइन् । ‘‘दाइले आफ्नै होटलमा वेट्रेसको काम छ भन्नुभयो ।

“सुरुमा महिनाको २० हजार तलब दिने भन्नुभयो । पछि तलब बढाउँदै लैजाने बताएपछि म उहाँहरूसँग आएकी हुँ’’ किशोरीले भनिन् ।

किशोरीलाई पोखरा लैजाने भन्दै भारत लैजान लागेको अनुसन्धानबाट खुल्यो । अनुसन्धानको क्रममा किशोरीलाई भारतको मुम्बई लैजान लागेको देखिएको छ ।

दिल्लीको जीबीरोड- जहाँ सयौँ नेपाली महिलाले बिताउँदै छन् नारकीय जीवन (भिडिओ)

त्यो काममा सम्बरबहादुरलाई सहयोग गर्ने ३३ वर्षीया इन्दिरा कटुवाल तामाङको पनि मिलेमतो रहेको खुल्यो । नुवाकोट तादी गाउँपालिका २ स्थायी ठेगाना भई हाल जिल्ला काठमाडौं टोखा बस्ने इन्दिरा भोलिपल्ट २७ गते आइतबार पक्राउ परिन् । उनीहरूमाथि अहिले काठमाडौं जिल्ला अदालतबाट दिन पाँचको म्याद थप अनुमति लिई आवश्यक अनुसन्धान भइरहेको छ ।

आर्थिक अवस्था कमजोर भएको परिवारकी किशोरीलाई गाउँबाटै फकाएर लैजाने सम्बरबहादुर एक वर्षअघि मात्रै जेलबाट छुटेका थिए ।

नुवाकोट घर भए पनि काठमाडौं तारकेश्वर नगरपालिका वडा नं. ७ बस्ने उनी १० वर्ष जेल बसेर २०८० वैशाखमा छुटेका व्यक्ति रहेका मानव बेचबिखन अनुसन्धान ब्युरोका प्रहरी उपरीक्षक ज्ञानेन्द्र प्रसाद फुयाँलले बताए ।

उनले भने, ‘‘नुवाकोट दुप्चेश्वर ६ भर भएका सम्बरबहादुर मानव बेचबिखन मुद्दामा १० वर्ष जेल बसेर अघिल्लो साल वैशाखमा मात्रै छुटेका थिए । छुटेपछि फेरि पुरानै धन्दामा लागेको भेटियो । पीडित किशोरी थिइन् । १८ नकटेको नाबालिग भएकाले नेपाल भारतको सीमा कटाउन गाह्रो हुने भएकाले अरुकै नागरिकता प्रयोग गरिएको पनि रहेछ ।’’

किशोरीलाई भारत लैजानको लागि सुनाकोठी, चापागाउँ र लेले हुँदै हेटौँडा जाने बाटो प्रयोग गरिरहेको भन्ने गोप्य सूचनाको आधारमा ब्युरो र प्रहरी वृत्त चापागाउँ सँगको समन्वयमा उनीहरूलाई पक्राउ गरिएको बताइएको छ ।

किशोरीको कमजोर आर्थिक अवस्थाको फाइदा उठाई नजिकको नातेदारलाई प्रयोग गरी सम्झाइबुझाई गर्न लगाएर विश्वासमा पारेको अनुसन्धानबाट खुलेको छ ।

फिल्मजस्तै ‘क्राइम थ्रिलर’ : चकलेटको खोलमा भित्रिन्छ कोकिन, पत्ता लगाउन विमानस्थलमा छैन मेसिन

सम्बरबहादुरले भारतीय आधार कार्डसमेत बनाएको पाइएको छ । उनको साथबाट ‘दिनेश थकुरा तामाङ’ नामको सक्कल भारतीय आधार कार्डसमेत फेला परेको छ ।

उनको सक्कल नेपाली नागरिकताको प्रमाण पत्र पनि साथमै बरामद भएको छ । भारतीय रुपैयाँ १३ हजार ९०० र नेपाली रुपैयाँ ७ हजार ३१० रुपैयाँसमेत बरामद भएको प्रहरीले जनाएको छ ।

सम्बरबहादुरले भारतमा यौन व्यवसायको लागि कोठी सञ्चालन गरी बस्ने एक महिलालाई भारतीय नम्बरबाट खोलेको ह्वाट्सएपमार्फत् पटकपटक सम्पर्क गरेको देखिएको प्रहरीले बताएको छ ।

श्रीमती नै बिक्री गरेपछि गएका थिए १० वर्ष जेल

नुवाकोट दुप्चेश्वर ६ का सम्बरबहादुर तामाङ पहिलोपटक २०६६ सालमा भारत गएका थिए । त्यसबेला उनी २४ वर्षका थिए । उनको बिहे भइसकेको थियो । उनी स्वदेश फर्किने र भारत जाने काम लगातार गरिरहन्थे ।

२०७० सालतिर उनले कैलालीकी एक युवतीलाई प्रेमजालमा फसाए । सामाजिक सञ्जालमार्फत भेटिएकी ती युवती सम्बरबहादुरसँग बिहे गर्न राजी भइन् । ती युवतीलाई उनले कैलालीमै गएर भेटे, मन्दीरमा लगेर बिहेको नाटक गरे ।

बिहेलगतै उनले नयाँ श्रीमतीलाई दिल्ली लगेर बेचे । केही महिनापछि सम्बरबहादुरकी श्रीमती उम्किएर स्वदेश आउन सफल भइन् ।

शाहरूखको फिल्म ‘डंकी’कै शैलीमा मानव तस्करी, भारतीय गिरोहको ट्रान्जिट काठमाडौं

भारतकै अधिकारकर्मीको एक संस्था र प्रहरीले गरेको उद्धारको क्रममा उनी परेकी थिइन् । स्वदेश आएपछि उनले दिएको जाहेरीको आधारमा सम्बरबहादुर पक्राउ परेका छन् । पक्राउ परेपछि १० वर्ष जेल सजायको फैसला भयो ।

२०८० साल वैशाखसम्म उनी जेलमै थिए । जेलबाट छुटेलगतै उनी फेरि भारत गए । अव उनी दिल्ली नभई मुम्बईको कोठीमा कनेक्सन बढाए । नेपाल आउँदा तारेकश्वर मनमैजु बस्थे ।

अहिले उनले किशोरीलाई उतै मुम्बई लैजान लागेको प्रारम्भिक अनुसन्धानबाट खुलेको छ । जेलबाट छुटेको पछिल्लो एक वर्षमा उनले अरू पनि युवती तथा किशोरीलाई भारत लगेको हुनसक्ने आशंका छ ।

१४ वर्षीया बालिका बेच्न लैजाँदै गर्दा सम्बरबहादुर पक्राउ, जो १० वर्ष जेल बसेर छुटेका थिए