पुल्चोकका निमित्त क्याम्पस प्रमुख रेग्मीसहित विभागीय प्रमुखले दिए सामूहिक राजीनामा

नेपालभ्युज

काठमाडौं । पुल्चोक इन्जिनियरिङ क्याम्पसका निमित्त प्रमुखसहित विभागीय प्रमुखहरुले सामूहिक राजीनामा दिएका छन् ।

बुधबार निमित्त क्याम्पस प्रमुख लोकनाथ रेग्मीको अध्यक्षतामा बसेको बैठकले सामूहिक राजीनामा दिने निर्णय गरेको थियो ।

निमित्त क्याम्पस प्रमुख रेग्मीका अनुसार बैठकको सोही निर्णय अनुसार उनीहरु सबैले इन्जिनियरिङ अध्ययन संस्थानको डिन कार्यालयमा राजीनामा बुझाएका हुन् ।

इन्जिनियरिङ अध्ययन संस्थानका डिन र सहायक डिनहरुलाई सत्तारुढ दलका विद्यार्थी प्रतिनिधिले दबाबमा पारेर पुरानै शुल्कमा इन्जिनियरिङको स्नातक तह अध्ययन गराउन प्रवेश परीक्षा सञ्चालनको सूचना जारी गर्न लगाएको प्राध्यापकले आरोप लगाएका छन् ।

संस्थानले तीन लाख १८ हजार रहेको इन्जिनियरिङको स्नातह तह अध्ययनको शुल्क यो वर्षदेखि बढाएर ७ लाख ७५ हजार पुर्‍याएपछि विवाद सुरु भएको थियो ।