लुम्बिनीलाई पराजित गर्दै सुदूरपश्चिमले जित्यो यू–१९ क्रिकेटको उपाधि

काठमाडौं। सुदूरपश्चिमले यू–१९ क्रिकेट प्रतियोगिताको उपाधि जितेको छ। त्रिवि अन्तर्राष्ट्रिय क्रिकेट मैदानमा सोमबार भएको खेलमा सुदूरपश्चिमले साविक विजेता लुम्बिनी प्रदेशलाई ६ विकेटले पराजित गरेको हो।

९३ रनको लक्ष्य सुदूरपश्चिमले २१ ओभरमा ४ विकेट गुमाएर भेट्टायो। सुदूरपश्चिमको लागि गजेन्द्र बोहोराले अविजित ३९ र दीपक बोहोराले २५ रन बनाए।

लुम्बिनीको लागि रमेश कुर्मीले २ तथा निर्मल गुरुङ र अभिषेक गुरुङले १–१ विकेट लिए। पहिले ब्याटिङ गरेको लुम्बिनीले २९.१ ओभरमा अलआउट हुँदै ९२ रन मात्रै बनायो। आकाश त्रिपाठीले ३८ र नर सार्कीले ११ रन जोडे।

सुदूरपश्चिमका मिलन बोहोराले ५ विकेट लिए । यस्तै नरेन साउद र हेमन्त धामीले २-२ तथा आकाश चन्दले १ विकेट लिए।

प्रतियोगिताको विजेता सुदूरपश्चिमले २ लाख र उपविजेता लुम्बिनीले १ लाख रुपैँया प्राप्त गरेको छ।

गत वर्षको फाइनलमा लुम्बिनीले सुदूरपश्चिमलाई ११३ रनले हराएको थियो। प्रतियोगितामा सुदूरपश्चिम, लुम्बिनी, प्रदेश–१, मधेस, बागमती र गण्डकी प्रदेशले सहभागिता जनाएका थिए।