केहि ठाउँमा बाक्लो हिमपातका कारण कर्मचारी पुग्न सकेनन्, हुम्लामा हेलिकप्टरको प्रयोग

काठमाडौं। देशका केहि ठाउँमा बाक्लो हिमपात भएको छ । हुम्ला,मनाङ् र मुस्ताङ्का हिमाली क्षेत्रमा बाक्लो हिमपात भएका कारण मतदान गराउनको लागि हिँडेका कर्मचारी समस्यामा परेका छन् ।

मुस्ताङका प्रहरी प्रमुख डीएसपी रविन्द्र पौडेलका अनुसार बाटोमा हिउँ जमेका कारण वारागुङमुक्ति क्षेत्र गाउँपालिका–५ साङ्ताको हिमाली आधारभूत विद्यालय मतदान केन्द्रमा मतदान गराउन कर्मचारी र सुरक्षाकर्मी पुग्न सकेका छैनन् । आज डोजर लगेर बाटो सफा गरी कर्मचारी पुर्याउने तयारी छ ।

हुम्लाको नाम्खा गाउँपालिका–६ को लिमीका तीन वटै मतदान केन्द्रमा हेलिकप्टरबाट कर्मचारी र सुरक्षाकर्मी पुर्याइएको छ । निमित्त निर्वाचन अधिकृत श्यामबहादुर रानाका अनुसार लिमीका तीन वटा मतदान केन्द्रका लागि खटिएका कर्मचारी र सुरक्षाकर्मीलाई हेलिकप्टरबाट लगिएको हो । हिमपातका कारण समस्या आउन सक्ने भएकाले त्यसतर्फ जाँदा पूर्व तयारी अपनाउन मौसमविद्को सुझाव छ ।

प्रतिनिधि सभा र प्रदेश सभा चुनावमा मतपत्र र चुनाव सामग्रीसहित २ लाख ४६ हजार ९ सय ६० कर्मचारी र नेपाली सेना, प्रहरी, सशस्त्र र म्यादी प्रहरी गरी झण्डै ३ लाख जनशक्ति खटिएको छ । देशभर एकैसाथ हुन लागेको चुनावमा कुल १ करोड ७९ लाख ८८ हजार ५ सय ७० मतदाता छन् ।

उनीहरूले १० हजार ८ सय ९२ मतदान स्थलमा रहेका २२ हजार २ सय २७ केन्द्रबाट मतदान गर्नेछन् । त्यस्तै, १ सय ४१ अस्थायी मतदान केन्द्रबाट ४ लाख ५० हजार अस्थायी मतदाताले प्रतिनिधि सभाको समानुपातिकमा भोट खसाल्नेछन् । प्रतिनिधि सभाका लागि २ हजार ४ सय १२ र प्रदेश सभाका लागि ३ हजार २ सय २४ जना उम्मेदवार छन् ।