रवी लामिछानेको गुनासो: नागरिकताको विषय ४ वर्षअघि टुंगिएको हो, कति पटक स्पष्टीकरण दिउँ?

काठमाडौं। राष्ट्रिय स्वतन्त्र पार्टीका अध्यक्ष रवी लामिछानेले नागरिकताको विषयमा आफूले स्पष्टिकरण दिँदा दिँदा हैरान भएको गुनासो गरेका छन् । रवी लामिछानेको नागरिकताबारे प्रश्न उठाएर उनको उम्मेदवारी नै खारेजीको माग गर्दै निर्वाचन आयोगमा उजुरी परेको छ ।

यहि विषयमा फेसबुक पेजमार्फत स्पष्टिकरण दिँदै लामिछानेले आफ्नो नागरिकताको विषय ४ वर्ष अघि नै टुंगिएपनि अझै कतिपटक स्पष्टिकरण दिइरहनुपर्नेहो भनेर प्रश्न पनि गरेका छन् । रवीले आफूविरुद्ध फिजिकल र डिजिटल दुवै माध्यमबाट आक्रमण भइरहेको तर यसले आफ्नो विजयको अभियानमा फरक नपर्ने बताएका छन् ।

राष्ट्रिय स्वतन्त्र पार्टीका सभापति एवं चितवन – २ का प्रतिनिधि सभा सदस्य उम्मेदवार रवि लामिछानेविरुद्ध उम्मेदवारी खारेजीको मागसहित मंगलबार उजुरी परेको छ । उम्मेदवार लामिछानेले विदेशी मुलुकको नागरिकता प्राप्त गरेपछि नेपालको नागरिकता त्याग नगरेकाले उम्मेदवारी खारेजी गर्नुपर्ने भन्दै उजुरी परेको हो ।

उनले लेखेका छन्, ‘एउटा नेपालीले पहिले प्रेस काउन्सिलमा, त्यसपछि २०७६ सालमा चितवन प्रहरीमा, त्यसपछि चितवन जिल्ला सरकारी वकीलको अभियोग पत्रमा, अनि चितवन जिल्ला अदालतको आदेस र फैसलामा, अनि उच्च अदालत हेटौडाको आदेसमा, अनि चितवन जिल्ला सरकारी वकील कार्यालय देखि महान्यायधिवक्ताको कार्यालयसम्म नागरीकताको बिषय समेतमा विवेचना भई सेटल भईसके पछि फेरी कति पटक स्पस्टीकरण दिनु पर्ने हो ?’