नागरिकता विधेयक पारित भएपछि सरकारमा जाँदै लोसपा

काठमाडौं। सरकारले संसद्बाट नागरिकता ऐन पारित गराएपछि लोकतान्त्रिक समाजवादी पार्टी (लोसपा) सरकारमा  सहभागी हुने भएको छ । प्रधानमन्त्री शेरबहादुर देउवाले लोसपालाई पनि सरकारमा सहभागी गराउने तयारी गरेका छन्।

सरकारले संसदबाट नागरिकता ऐन पारित गराएपछि लोसपा सरकारमा जान सकारात्मक भएको हो । लोसपा अध्यक्ष महन्थ ठाकुर निकट एक नेताका अनुसार सरकारमा सहभागी हुने सैद्धान्तिक सहमति बनेको छ।

‘सरकारमा जाने निश्चित भइसके पनि आज/भोलिमा  नै जाने भनी ठ्याक्कै भन्ने अवस्था नरहेको बताउँदै उनले भने, ‘हामीले उठाएको प्रमुख मुद्दा नागरिकता विधेयक हो । राष्ट्रपतिबाट प्रमाणीकरण हुने चरणमा छ ।’

लोसपाले सरकारमा जानका लागि नागरिकता विधेयक पारित, कार्यकर्तालाई लगाइएको झुटा मुद्धा फिर्ता लगायतको सर्त राखेको थियो । लोसपा नेता भन्छन्,‘फिर्ता लिन सकिने मुद्दाहरूका बारेमा प्रधानमन्त्रीसँग छलफल भइरहेको छ ।’

लोसपाले सरकारमा सहभागी हुनका लागि कम्तीमा दुई मन्त्रालय र थप एक राज्यमन्त्री पनि लोसपाको माग छ । प्रधानमन्त्री देउवाले मन्त्रिपरिषद्का सदस्यहरूको जिम्मेवारी हेरफेर गर्ने जानकारी पनि आफ्नो पार्टीलाई दिएको उनले बताए ।