भेरी अस्पतालमा एकै परिवारका चार जनाको मृत्यु, तीनको अवस्था गम्भीर

काठमाडौं। नेपालगञ्जको भेरी अस्पताल परिसर भित्र रहेको क्वाटरमा सुतेका चार जनाको मृत्यु भएको छ। अन्य तीन जनाको स्वास्थ्य अवस्था गम्भीर रहेको छ।

कालीकोट खाँडाचक्र–६ निवासी २३ वर्षीय धर्मप्रसाद भट्टराईको परिवारका सात जनामध्ये ४ जना बिहीबार बिहान मृत्यु भएको अवस्थामा भेटिएका हुन्। तीन जना बेहोसी अवस्थामा रहेको भेरी अस्पतालका मेडिकल सुपरिटेन्डेन्ट डा.वीरेन्द्र बहादुर चन्दले बताए।

अस्पतालको पश्चिमपट्टि परिसर भित्रै रहेको कर्णाली प्रदेश सम्पर्क कार्यालयको नेपालगञ्जस्थित मेडिकल स्टोरमा कार्यालय सहयोगीको रुपमा कार्यरत धर्मप्रसाद भट्टराईकोे क्वाटरबाट बिहीबार बिहान कोही नउठेपछि ढोका खोलेर हेर्दा भट्टराईसहित उनको ३ महीनाको छोरा इप्सन भट्टराई, आमा ४५ वर्षीया कोकिला भट्टराई, २७ वर्षीया दिदी नन्दकली भट्टराईकोे मृत्यु भएको अवस्थामा भेटिएका सूचना अधिकारी डा. संकेत कुमार रिसालले बताए।

यस्तै, गम्भीर घाइते हुनेहरुमा धर्मप्रसादकी २४ वर्षीया श्रीमती सुशिला, तीन वर्षीय छोरा विवश र १८ वर्षीय भाइ नरेन्द्रको भेरी अस्पतालको आपतकालीन कक्षमा उपचार भइरहेको मेसु डा. चन्दले जानकारी दिए।

आगो बालेर एकै कोठामा सात जना सुतेकोमा धुवाँ ग्यास पोइजन भएर मृत्यु भएको आशंका गरिएको डा. चन्दको भनाइ छ।

भेरी अस्पतलामा कार्यालय सहयोगीको रुपमा कार्यरत धर्मप्रसाद कर्णाली प्रदेश सम्पर्क कार्यालय नेपालगञ्जस्थित मेडिकल स्टोरको कर्मचारी रहेका भेरी अस्पतालले जनाएको छ।