‘झाँक्री’ भुजेलको उन्मादले निम्त्याएको त्रासदी, गर्भको शिशुसहित दम्पतीको दर्दनाक अन्त्य (भिडिओ)

काठमाडौं । आफूलाई धर्मगुरुका रूपमा चिनाउने ‘झाँक्री’ प्रकाश भुजेलको जीवनशैली र व्यवहारमा प्रायः अन्धविश्वास र लापरबाहीपन झल्किन्छ ।

बिरामी निको पार्छु भन्दै दैनिक सयौंलाई झारफुक गर्ने उनले ‘अन्धविश्वास’ पालेका बिरामी र रोगीबाट मोटै रकम असुल्थे ।

अन्धविश्वासको व्यापार गरेर आर्जन गरेको धनबाट महङ्गो घर र गाडी जोडेका थिए । नेपाली मूल्य साढे २ करोडभन्दा माथि पर्ने ल्यान्डक्रूजर प्राडो किनेका थिए ।

महङ्गो गाडी भएकाले भिडिओ बनाएर रवाफ देखाउने उनको बानी थियो । महङ्गो गाडीमा रवाफ देखाउँदै सामाजिक सञ्जालमा ‘भाइरल’ बन्ने उनको चाहना थियो । त्यो पूरा पनि भयो । किनकि रमाइलोकै लागि भए पनि मानिसहरूको उनको भिडिओ हेर्थे ।

साथमा दुई चारजना केटाहरू लिएर हिँड्थे प्रकाश । उनी आफैँ गाडी चलाउँथे । गाडी चलाउँदै बेफिक्री मोबाइलमा लाइभ गर्थे । गाडी चढेको, सीटमा बसेको, सिटबेल्ड बाँधेकोदेखि गाडी कुदेपछि वरपरको दृश्य देखाउने उनको दैनिकी थियो ।

गाडी चलाउँदा प्राय: टिकटक वा फेसबूक लाइभ गर्नु र बेतुकका गफ दिनु भुजेलको दिनचर्या जस्तै थियो ।

सवारी चलाउँदा मोबाइल फोन प्रयोग गर्न निषेध हुन्छ । तर, उनमा यो नियम लागू थिएन । सामाजिक सञ्जालमा भाइरल भएकै कारण उनलाई बाटोमा देख्ने ट्राफिक प्रहरीले केही भन्दैनथे । दुर्घटनाको २ दिनअघि उनले गाडी चलाउँदै गरेको फेसबूक लाइभको लिङ्क यही हो ।

भाइरल भएकैले प्रहरीले गरेको अनदेखाको छुटको दुरुपयोग गर्दै उनी प्राय: एक हातले गाडीको स्टेरिङ र अर्को हातले मोबाइल समातेर हुइँकाउँथे । कहीँ कतै ट्राफिकले रोकिहालेमा पत्रकार परिचयपत्र देखाएर सजिलै उम्किन्थे ।

दुईचार कक्षा मात्र पढेका उनले एसएलसी उत्तीर्ण गरेको सर्टिफिकेट बनाएका छन् । सिन्धुपाल्चोकका उनले सानैमा पढाइ छाडेर गाडीमा खलासी बसेका थिए ।

तर, भुजेलले सुनसरीको एक स्कूलबाट एसएलसी पास गरेको सर्टिफिकेट पेस गरेर ‘टीभी पन्चली’ नाम गरेको एक युट्यूब च्यानलबाट पत्रकार परिचयपत्र लिएका छन् ।

उनको सर्टिफिकेट नक्कली भन्दै परेको उजुरीमा छानबिन भइरहेको छ । उनको लापरबाही त्यत्तिमा सीमित थिएन, गाडी चलाइको स्पीड पनि उस्तै हुन्थ्यो । त्यसमा पनि उनी गाडी चलाउन सिकारु नै थिए ।

यो समाचार प्रकाशन हुँदासम्म भुजेलको साथबाट गाडी चलाउने अनुमति पत्र लाइसेन्स भेटिएको छैन । दुर्घटनापछि प्रहरी वृत्त बौद्धको हिरासतमा रहेका भुजेलले आफ्नो लाइसेन्स भएको दाबी गरे पनि देखाउन सकेका छैनन् ।

अनुसन्धान अधिकारी भन्छन्, “उनले घरी लाइसेन्स घरी छ भन्छन्, घरी हरायो भनेका छन् । कसैलाई ल्याउन लगाउँछु भनेका छन् । अहिलेसम्म ल्याउनसक्नुभएको छैन ।”

***

बुधबार दिउँसो भुजेल १ बजे निवासबाट निस्किए । कागेश्वरी मनोहरा थली बस्ने उनी साँखुतिर लागे उनकै शैलीमा ।

बा १९ प २६९५ नम्बरको ‘ल्यान्डक्रूजर’मा दुईजना साथीहरू पनि थिए । उनी चालकको सीटमा बसे । एकहातले स्टेरिङ र अर्को हातले मोबाइल समाते । गाडी चलाउँदै भिडिओ बनाउँदै हुइँकिए ।

भ्रम बेचेर ‘भाइरल’ प्रकाश भुजेल, उपचार गर्ने र भिजा लगाइदिने भन्दै यसरी ठगिरहेछन् सिधासाधालाई (भिडिओ)

गाडीको स्पीड तीव्र थियो तर, उनको ध्यान सडकमा भन्दा भिडिओमा थियो । गाडी कागेश्वरी मनोहरा नगरपालिका क्रस भएर शङ्खरापुर नगरपालिका प्रवेश गर्‍यो । सीमा छुट्टाउने महादेवखोला पुल क्रस भएर इन्द्रायणी पुग्दा अगाडिबाट आयो, एक मोटरसाइकल ।

बागमती प्रदेश -०२-०१८ प ६८७५ नम्बरको मोटरसाइकल आफ्नै लेनमा थियो । स्थानीयको अनुसार भुजेलको गाडी लेन मिचेर दायाँतर्फ थियो ।

मोटरसाइकल नजिक आइसकेको थियो । तर, भुजेलले आफ्नो लेनमा गाडी ल्याउन नसकेर ठक्कर दिए । तीव्र गतिमा गुडेको गाडीले मोटरसाइकल ठक्कर दिएपछि हुत्तिएर बायाँपट्टि किनाराको घरमा ठोक्कियो ।

गाडीले हानेपछि मोटरसाइकल १५ मिटर पर उछिट्टियो । मोटरसाइकलमा सवार कागेश्वरी मनोहरा २ का ३८ वर्षीय नारायण नगरकोटी र उनकी पत्नी भुइँमा बजारिए । पछाडि सवार नारायण पत्नी सानुमायाको गर्भमा एक सन्तान हुर्किँदै थियो ।

भुजेलले एकहातले चलाईएको मोबाइल उछिट्टियो । घटनापछि भागेका भुजेलले बुधबार साँझ भाइ नाता पर्ने दीपक भुजेलको फेसबूकमार्फत लाइभमा आएका थिए । उनले स्वीकारेका छन्, “मेरो मोबाइल कता उड्यो, उड्यो ।”  घटनापछि भागेका भुजेल साँझ पक्राउ परे ।

ठक्करबाट मोटरसाइकलमा सवार नगरकोटी दम्पती गम्भीर घाइते भएका थिए । स्थानीय अस्पतालमा उपचारपछि धापासीस्थित ग्राण्डी अस्पताल लगियो । त्यही दुवैको निधन भयो ।

भिडिओ हेर्न-

नगरकोटी दम्पतीको पारिवारिक चिनजानका सागर थापाका अनुसार नारायण पत्नी सानुमायाको पेटमा पाँच महिनाको शिशु हुर्कँदै थियो ।

उनले भने, “दुर्घटनापछि सानुमायाको टाउको गम्भीर चोट थियो । गर्भका रहेको शिशु त्यही निधन भएको आशङ्का छ । धेरै रगत बगिरहेको थियो ।”

अस्पतालले समेत सानुमायाको पेटमा गर्भ रहेको बताएको छ । यसरी भुजेलको लापरबाहीले नगरकोटी दम्पती र पेटको बच्चाको ज्यान गयो ।

दुर्घटनाअघि प्रकाशको गाडी देखेका ब्रहमखेलका स्थानीय रामप्रसाद खड्का भन्छन्, “हामी सडकमा हिँडिरहेका थियौँ । परबाट गाडी हुइँकिँदै आयो । गाडीमा प्रकाश भुजेल थिए । अगाडिपट्टि बाटो क्रस गरिरहेको एउटा कारसँग झन्डै ठोक्किएन । आँखा छैन भन्दै हप्काएर अघि लागे ।”

त्यही उनको गाडीको तीव्रता र लापरबाही रोकिएको भए दुर्घटना नहुने स्थानीयको दाबी छ ।

त्यहाँबाट अली अगाडि गएपछि भुजेलले चलाएको गाडीले विपरीत दिशाबाट आइरहेको मोटरसाइकललाई ठक्कर दियो ।

दुर्घटनामा गर्भको शिशुसहित दम्पतीको ज्यान गएपछि आक्रोशित स्थानीयको भीड

छोरी टुहुरा : अब कसले देला स्नेह र सहारा ?

मृतक नारायण दम्पती छोराको प्रतीक्षामा थिए । उनिहरूका आठ वर्ष र साढे ३ वर्षकी दुई छोरी छन् ।

नारायण र सानुमायाको निधनले आलापोट शोकमा डुबेको छ । बाबुआमा गुमाएका दुई सानी छोरीहरूलाई कसरी सम्हाल्ने भन्ने चिन्ता आफन्तमा छ ।

उनीहरूले सधैँभरि स्नेहपूर्ण साथ र सहारा दिने अभिभावकको स्पर्श गुमाए । यसरी भुजेलको लापरबाहीले एउटा परिवारको जीवनलाई भयानक अन्त्यसम्म पुर्‍यायो ।

चालक भुजेलले लापरबाहीपूर्वक ओभर स्पीड चलाएको कारण दुर्घटना भएको कागेश्वरी २ का वडाध्यक्ष सुरज खड्का बताउँछन् ।

उनी भन्छन्, “गाडी झन्डै सयको स्पीडमा हुनुपर्छ । सडक पेटी नाघेर उडेर पसलमा गएर ठोक्किएको छ । ल्यान्डक्रूजरसमेत ब्रेक नलाग्ने भनेपछि कति स्पीड होला । पर गएर फलफूल पसल र किराना पसलमा पुग्यो । यसैले लापरबाहीपूर्वक चलाएको देखिन्छ ।”

पक्राउ परेका भुजेललाई बिहीबार प्रहरीले अदालतमा पेस गरेको छ । सवारी ज्यान मुद्दामा अनुसन्धानको लागि पहिलो चरणमा पाँच दिनको म्याद पाएको छ ।

फेसबुकबाट भिडिओ हेर्न-