२९औं संस्करणको क्यान इन्फोटेक माघ २५ गतेदेखि सञ्चालन हुने

काठमाडौं। क्यान इन्फोटेकको २९औं संस्करण माघ २५ गतेदेखि काठमाडौंमा सञ्चालन हुने भएको छ ।

कम्प्युटर एसोसिएसन नेपाल महासंघ (क्यान)ले बिहीवार पत्रकार सम्मेलन गरेर मेला माघ २५ देखि २९ गतेसम्म भृकुटिमण्डपमा हुने जानकारी गराइएको हो । मेलाको तयारी पनि अन्तिम चरणमा पुगेको क्यानले जनाएको छ ।

पत्रकार सम्मेलनमा बोल्दै क्यानका महासचिव चिरञ्जीवि अधिकारीले माघ २५ गतेबाट भृकुटीमण्डपस्थित प्रदर्शनी हलमा २९औं संस्करणको क्यान इन्फोटेक मेला हुन लागेको बताए । उनले यस पटक क्यान इन्फोटेकको टिकेटिङ पार्टनर ईसेवामार्फत इन्फोटेकको टिकेट खरिद गर्न सकिने व्यवस्था गरेको र यस अन्तर्गत सर्वसाधारणका लागि एक सय र विद्यार्थीका लागि ५० रुपैयाँ शुल्क तोकिएको जानकारी दिए ।

सूचना तथा सञ्चार प्रविधि क्षेत्रमा विकास भएका नयाँनयाँ प्रविधिको प्रदर्शनी तथा यस क्षेत्रको विकासका लागि आवश्यक रणनीति निर्माणका निम्ति सार्थक अन्तक्रिया गर्ने उद्देश्यले क्यानले मेला गर्दै आएको छ ।

महासचिव अधिकारीले क्यान इन्फोटेक २०२४ मा नेपालमै विकास गरिएको जेनेरेटिभ एआई सिस्टम कान्छी रोबटको बेटा संस्करण सार्वजनिक हुने बताए ।