अंकविहीन हुनबाट जोगियो कोशी, अन्तिम खेलमा लुम्बिनीमाथि १६ रनको जित

काठमाडौं। प्रधानमन्त्री कप राष्ट्रिय क्रिकेटमा कोशी प्रदेश अंकविहीन हुनबाट जोगिएको छ ।

लिग चरणको आफ्नो अन्तिम खेलमा मंगलबार लुम्बिनी प्रदेशलाई पराजित गर्दै कोशीले प्रतियोगितामा सुखद अन्त्य गरेको हो ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा मंगलबार भएको खेलमा कोशीले लुम्बिनीलाई १६ रनले पराजित गर्‍यो ।

लगातार ८ खेलमा पराजित भएको कोशीले आफ्नो नवौं तथा अन्तिम खेलमा सान्त्वना जित प्राप्त गर्‍यो। ८ खेलबाट २ अंक जोडेको लुम्बिनी भने नवौं स्थानमा छ भने समान अंक भएको कोशी २ अंकमा पुछारमा छ ।

१७३ रनको लक्ष्य पछ्याएको लुम्बिनी ४६.५ ओभरमा १५६ रनमा अलआउट भयो। लुम्बिनीका लागि दिलसाद अलिले ३२ र विराट भण्डारीले २८ रन जोडे। लुम्बिनीलाई सस्तैमा अलआउट गर्न कोशीका सौजन घिमिरेले ३ विकेट लिए। आभ्याश तिमिसिना, समिर कार्की र कमल खत्रीले २–२ विकेट लिए।

पहिले ब्याटिङ गरेको कोशी ४४.४ ओभरमा १७२ रनमा अलआउट भयो। कोशीका लागि अंकित सुवेदीले ४९ र सौजन घिमिरेले ४३ रन बनाए।
कोशीलाई सस्तैमा प्याक गर्न नर सार्कीले ४, वीर मगरले ३, अभिषेक गौतमले २ तथा कृष्णा कार्कीले १ विकेट लिए।